Былтырғы Гагарин кубогы хужаһы СКА быйыл абына ла һөрөнә. Уртаса командалар рәтенә төштө. Өфө хоккейсылары ла бер мәл иң артта һөйрәлгәйне. Әле нисек уйнарҙар?Хәҙер “Салауат Юлаев” – “атта”! Шуға ла көйәрмән тик еңеү көтә. Ләкин ҡапҡан һайын ҡалъя булмай шул...
Матч уңышһыҙ башланды. Тәртип боҙоп, ике тапҡыр әҙселектә ҡалдыҡ. Хужалар быны оҫта файҙаланды: ике шайба индерҙеләр. Күңелгә шом тулды: СКА-ла ил йыйылма командаһына ингән Ковальчук, Дадонов, Шипачев уйнай, ҡыуып етеп булырмы?.. Уф, ярай беҙҙекеләр ҙә төшөп ҡалғандарҙан түгел. Өс тапҡыр һөҙөмтәле һөжүм итеүгә, юлаевсылар алға сыҡты – 3:2. Максим Майоров менән Игорь Григоренконың голдары ҡарап туймаҫлыҡ ине!
Әммә һуңғы осорҙа бәхет йылмайманы шул. Аҙаҡҡы минуттарҙағы штраф алыуҙар ҙа иҫәпте тигеҙләүгә ышанысты бөтөрҙө. СКА бер-бер артлы өс шайба индереп, еңеүҙе нығытып ҡуйҙы. Их, теш үтмәне дәғүәселәргә...
Бөгөн КХЛ-дағы сираттағы тәнәфес алдынан һуңғы матч. Беренсе канал кубогына турнир уҙғас, 22 декабрҙә ҡунаҡҡа Мәскәүҙең “Динамо”һын көтәбеҙ.