Өфөләге ишетеү мөмкинлеге сикләнгәндәр өсөн коррекция мәктәп-интернатында республиканың ошондай дөйөм белем биреү учреждениеларынан спорт өлкәһендә юғары һөҙөмтәләргә өлгәшкән уҡыусыларға “Милләт йәшлеге” төбәк йәмәғәт фонды тарафынан премиялар тапшырылды.
Сарала ҡунаҡтарҙы еңел атлетика буйынса 18 тап­ҡыр донъя, 43 тапҡыр Европа чемпионкаһы, Рәсәй Паралимпия комитетының вице-президенты Рима Баталова сәләм­ләне. Бү­ләкләү тантанаһына Өфө, Туймазы, Стәрлетамаҡ ҡалаларында урынлашҡан коррекция мәктәп-интернаттарынан ярыштарҙа иң күп еңеүҙәр яулаған биш уҡыусы саҡы­рылғайны. Улар араһынан, әле мәктәп йәшендә булыуҙарына ҡа­рамаҫтан, Ирина Токарева менән Альберт Косенко Башҡортостандың йөҙөү буйынса йыйылма коман­да­һына инә. Ә иң йәш спорт­сы Дарина Ғилу­а­нова – III класс уҡыусыһы ғына. Һаулыҡ мөмкинлеге сикләнһә лә, рухтары ныҡ, көслө уларҙың.
Рәсәй Паралимпия ко­митетының вице-президенты Рима Баталова:
– Спортта уңыштар те­ләйем һеҙгә! Бары көслө ынтылыш булғанда ғына уға ирешергә мөмкиндер, ә төп маҡсат – Паралимпия уйындарында еңеү. Тимәк, алға, бары алға! – тигән те­ләктәрен дә еткерҙе йәш­тәргә.