Йә, Хоҙай, күптән күргән юҡ ине бындайҙы! Ҡапыл “Салауат Юлаев”тың дүрт-ете йыл элекке уйындары иҫкә төштө. Бәлки, чемпион булған яҙҙар кире әйләнеп ҡайтыр?..

Юҡ та, улай уҡ булмаҫ. Командалағы пробле­маларҙы һуҡыр ғына күрмәй. Шулай ҙа һуңғы ике матчты телевизорҙан һоҡланып күҙәт­тек.
Финляндияла “Йокерит”ты 5:1, Латвияла “Динамо”ны 5:3 иҫәбенә ҡыйраттыҡ. Әлбиттә, осрашыу башланыр-башлан­маҫтан еңелеп бармаһа, юлаевсылар юлаевсы булмай. Аҙаҡ бөтә көскә уйынға һынылыш индереп ҡуялар. Шулай күңелдең нескә ҡылдарын тартҡыларға әүәҫ улар. Әммә тап шундай уйын өсөн ярата ла инде көйәрмән хок­кейҙы.
Ниһайәт, беҙҙең легио­нерҙар оҫталығын күрһәтергә тотондо. Линус Умарк ҡына түгел, хәҙер Сами Леписте менән Андреас Энквист та етеҙ ҡыбырлай. Иң мөһиме – шайба ҡапҡаға юлды йышыраҡ таба. Голдар ҙа береһенән-береһе матурыраҡ!
Әйткәндәй, Көнсығыш конференцияла 8-се урынға менеп ҡунаҡланыҡ. Плей-офҡа эләгә­беҙ, тимәк! Өҫтәүенә Магнито­горскиҙың “Металлург”ы менән Ҡазандың “Аҡ Барыҫ”ы ла турнир таблицаһында уртала тапана. Ә алдағы ике осрашыу – тап улар менән. Кем кемде?..