Быйыл хоккей миҙгеле ғәҙәттәгенән күпкә иртәрәк – 24 августа уҡ – башланды. Киләһе яҙҙа 28 команданың ҡайһыһы чемпион булыры билдәһеҙ, әммә стадиондарҙа ҡыҙыу алыш бара ла инде.“Салауат Юлаев” иһә миҙгел алдынан тулыһынса тиерлек яңырҙы. Яңы тренерҙар, күп кенә яңы уйынсылар килде. Элек беҙҙә дан ҡаҙанып, Мәскәүҙең ЦСКА-һына киткән Игорь Григоренко ла кире ҡайтты. Ул хәҙер – капитан.
Ҡыҙғанысҡа ҡаршы, команда әлегә элекке хаталарҙан арына алмаған. Ҡапҡасыларҙы ышаныслы тип әйтеп булмай, һаҡ һыҙығы бөтөнләй аҡһай. Юҡҡамы ни, тәүге матчтарҙа “Авангард”тан 2:4, “Барыҫ”тан 3:5 иҫәбенә еңелделәр. Өфөләге осрашыуҙарҙа хәл үҙгәрер, бәлки, тип өмөтләнде көйәрмәндәр. Юҡ шул, “Югра”ны отһалар ҙа (4:2), артынса “Автомобилист”ҡа бирешеп ҡуйҙылар (4:5).
Һөҙөмтәлә командабыҙ турнир таблицаһында артта һөйрәлә. Йыл да хәлдең ошолай башланыуын иҫәпкә алғанда, был ҡурҡыныс түгелдер ҙә... Шулай ҙа юлаевсыларҙан яңы, уңышлыраҡ уйын көтөп ҡалабыҙ.