Ҡала һәм төбәк үҫешенә тос өлөш индергән Учалы тау-байыҡтырыу комбинатының Сибай филиалы Башҡортостан баҡыр-көкөрт комбинатының данлы традицияларын лайыҡлы дауам итә. Баҡыр һәм баҡыр-цинк мәғдәнен етештереүҙә республикала алдынғылыҡты бирмәгән комбинат етәкселеге таусыларҙың социаль проблемаларын һәр саҡ ыңғай хәл итә, ҡалала үткәрелгән күп сараларҙың даими бағыусыһы булып ҡына ҡалмай, күп кенә спорт объекттарын төҙөүгә лә үҙ өлөшөн индерә. Күптән түгел ҡаланың спорт һөйөүселәре өсөн Көнсығыш биҫтәһендә яһалма япма түшәлгән өр-яңы спорт майҙаны файҙаланыуға тапшырылды. Объекттың дөйөм хаҡы – 2 миллион һумдан ашыу, майҙаны – 680 квадрат метр. Яһалма япма экологик яҡтан барлыҡ талаптарға яуап бирә, тап шундайҙар халыҡ-ара донъя ярыштарында ҡулланыла. Спорттың төрлө төрҙәре өсөн тәғәйенләнгән майҙансыҡтың өҫкө япмаһы полимер һеңдерелгән резина вағынан яһалған. Бындай йомшаҡ материал йәрәхәт алыуҙан һаҡлай. Төҙөүселәр спорт майҙансығын футбол, баскетбол һәм волейбол уйнау өсөн йыһазландырған. Теләһәң, туп тип, кәрәк икән, баскетбол уйна.
Таусыларҙың бүләге ҡаланың Көнсығыш биҫтәһендә йәшәүселәр өсөн генә түгел, ғөмүмән, сәләмәт тормошто үҙ итеүселәр, спорт яратыусылар өсөн бик кәрәкле һәм файҙалы. Ямғырға һәм ҡаты һауыҡтарға бирешмәгән спорт майҙансығында киләсәктә данлыҡлы футболсылар үҫмәҫ тимә!