Хәбәр итеүебеҙсә, ете егеттән торған саңғысылар төркөмө Баймаҡ – Өфө йүнәлешендәге сәйәхәтен лайыҡлы тамамланы. Бөйөк Еңеүҙең 70 йыллығына арналған акцияла ҡатнашыусылар республиканың бер нисә ра­йо­ны аша 400 саҡрым ара уҙҙы.

Саңғысыларҙы ҡаршы алыу танта­наһында Бөйөк Ватан һуғышы ветера­ны, 1971–1985 йылдарҙағы мәғариф ми­нистры Сабир Йыһаншин:
– Ҡышҡы көндә 25-50 саҡрым юл үтергә баҙнат итеүҙәре менән улар йәш быуын өсөн күркәм өлгө булып тора. Егеттәрҙең илһө­йәрлек хисенә сикһеҙ һоҡланам, башҡаларға үрнәк итеп ҡуям, – тип, һәр береһенә бүләккә 1050-се полк командиры Исхаҡ Ғүмәровтың Берлин операцияһындағы батырлыҡтары хаҡында яҙылған китабын тапшырҙы.
Рәсәй Пенсия фондының Баймаҡ ҡалаһы һәм районы буйынса идаралығы начальнигы Илгиз Сәлихов тәҡдиме менән ойош­то­рол­ған сараны бөгөн заман күҙле­ге­нән, һис шикһеҙ, оло батырлыҡ тип баһаларлыҡ. Баш ҡаланың Еңеү паркындағы тантана бары­шын­да Баймаҡ районы ха­кимиәте башлығы Илшат Ситдиҡов етәксе­легендәге де­легация, йәштәр берлеге вәкилдә­ре сығышында ла берҙәмлек, тарихҡа, Еңеү өсөн йәнен аямай тырышҡандарға ҡа­ра­та ихтирам тойғоһо асыҡ сағылды.
Баймаҡ халыҡ ижады үҙәге хеҙ­мәткәр­ҙәре башҡарыуындағы йырлы-моңло тамашанан һуң саңғысы егеттәр Советтар Сою­зы Ге­рой­ҙары Александр Матросов ме­нән Миң­леғәле Ғөбәйҙуллиндың һәйкәленә сәскә һал­ды. Ә Республика Хәрби дан музейында мәртә­бәле марафондың картаһы төшөрөл­гән таш плитә урын алды.