Ай башынан хоккей донъяһы йәнләнеп китте: 27-28 февралдә плей-офф башлана бит. Ә бына “Салауат Юлаев” артыҡ көс һалмай хәҙер, сөнки әлеге урынынан өҫкә күтәрелә алмаясаҡ. Шуға ла уның “Северсталь” (4:5), ЦСКА (1:2), “Йокерит” (0:2) командаларынан еңелеүе әллә ни ҙур әһәмиәткә эйә түгел. Кисә иһә “Адмирал”ды 3:1 иҫәбенә еңделәр.

Бөгөн юлаевсылар Көнсығыш конференцияла бишенсе урында килә. Дүртенселәге команданан 19 мәрәйгә ҡалышалар. Ә уйнарға алты ғына матч ҡалған, ҡыуып етеп булмаясаҡ.
Быйылғы плей-офф ауырға төшмәксе. Юлаевсылар, тәүге әйләнештә үк отолоп, артабанғы ярыштан мәхрүм ҡалмаһа әле... Уларға тура киләсәк “Аҡ Барыҫ” та, “Себер” ҙә, “Металлург” та, “Авангард” та көсһөҙ түгел. Ә икенсе раундҡа һис шикһеҙ үтергә кәрәк, сөнки Гагарин кубогы илдең һигеҙ ҡалаһы буйлап сәйәхәткә сыҡты ла инде. Әле төп призды Мәскәүҙә күрһәтһәләр, алдағы ял көндәрендә ул Санкт-Петербург, Ярославль, Түбәнге Новгород, Ҡазан, Екатеринбург ҡалалары буйлап йөрөйәсәк.
14-15 мартта Кубокты Өфө көйәрмәндәре тамаша ҡыласаҡ. Был ваҡытта плей-офта икенсе әйләнеш уйындары барасаҡ. Шул саҡта “Өфө-Арена”ла КХЛ-дың ҡасандыр беҙ тотоп ҡараған иң ҙур бүләге лә торһа, ниндәй шәп буласаҡ!