Мораҡ ауылы мәҙәниәт йортонда Спорт байрамы ысын мәғәнәһендә халыҡ йыйынына әйләнде. Сәхнәлә спортты һәм физкультураны үҙенең тормош юлы итеп һайлағандар, был өлкәлә юғары һөҙөмтәләргә өлгәшкән спортсылар тәбрикләнде. Район етәксеһе Фәрит Мырҙагилде улы Мусин физкультура уҡытыусыларын, спорт һөйөүселәрҙе, ҡунаҡтарҙы байрам менән ҡотланы. Район исемен республика, Рәсәй кимәлендә яҡлаған спортсыларға, ғүмерен спорт менән бәйләгән тренерҙарға тырышлыҡтары һәм призлы урындар яулағандары өсөн рәхмәт белдерҙе.
Райондың спорт мәктәптәре, 37 спорт залы, ике спорт-һауыҡтырыу комплексы бар. Хакимиәттең йәштәр эше һәм спорт бүлеге мөдире Илнур Сәйфуллин билдәләүенсә, быйыл волейбол, баскетбол, футбол, полиатлон, еңел атлетика, шахмат һәм йөҙөү буйынса төбәк-ара, республика кимәлендәге 124 спорт сараһы уҙғарылған. Физкультура һәм спорт менән шөғөлләнеү өсөн матди-техник база ныҡлы. Быға дәлил – Мораҡ һәм Тәүәкән ауылдарындағы бассейнлы комплекстар. Үҙ эштәренә тоғро хеҙмәт иткән һәм һәйбәт һөҙөмтәләргә өлгәшкән Зиннур Абдуллин, Мансур Абуҡаев, Илназ Буранбаев, Фирғәт Килдебаев, Хәлит Сәлтәшев, Илвир Сәйфуллин, Данил Хәсәнов, Фирғәт Әйетҡолов иң шәп ауыл физкультура уҡытыусылары һәм тренерҙар булараҡ танылған.
Волейбол буйынса республика ярышында 33 команда араһында Әлмира Килдебаева етәкселегендәге ҡыҙҙар командаһы бронза миҙал алған. Байрамда тренер Фирғәт Килде- баевтың еңел атлеттары, Илвир Сәйфуллин менән Рәсүл Ҡыҙрасовтың хоккейсы үҫмерҙәре, Тәүәкән ауылының “Урал” спорт-һауыҡтырыу комплексы тәрбиәләнеүселәре лә бүләкләнде. Көрәш, бокс секцияларында, турист слеттарында ҡатнашҡан балалар ҙа өлөшһөҙ ҡалманы.
Сочи ҡалаһында уҙған XXII Ҡышҡы Олимпия уйындарына арнап район мәктәптәрендә ойошторолған спартакиада еңеүсеһе −– Мораҡ башҡорт гимназияһы һәм Сапыҡ мәктәбе тантанала айырыуса ҙурлап билдәләнде.
Райондың Әнисә Демченко етәкселегендәге инвалидтар ойошмаһы, республика һәм Рәсәй ярыштарында ҡатнашып, уңыштар яулай. Зинира Садиҡова, Руслан Спиридонов, Илгиз Ишмөхәмәтов йыл да үткәрелгән спартакиадала әүҙем ҡатнашып, күпалыш буйынса Башҡортостан чемпиондары булған.
Спорт тармағын үҫтереүҙә тос өлөш индергәне өсөн район хакимиәте башлығы Фәрит Мусин Башҡортостандың Йәштәр сәйәсәте һәм спорт министрлығының “Башҡортостан Республикаһында спортты үҫтереүгә индергән өлөш өсөн” Почет билдәһе менән бүләкләнде. Әлмира Килдебаева, Айрат Шәрипов “Башҡортостан Республикаһының иң яҡшы физкультура һәм спорт хеҙмәткәре” Почет билдәһе, ә Фәрит Илғыуатов Почет грамотаһын алыу өсөн сәхнә түренә саҡырылды. Спортты үҫтереүҙә әүҙем ҡатнашҡан Әмир Зиннәтуллин, Ринат Ибраһимов, Николай Хрипунов Министрлыҡтың рәхмәт хаттарын, Ғайса Янбаев, Гөлгөнә Исмәғилева, Илвир Сәйфуллин район хакимиәте бүләктәрен алып һөйөндө.
Концерт сығыштары менән үрелеп барған сара ифрат күңелле булды.
Зинира 1979 йылда Күмертау ҡалаһында Фәүзиә менән Наил Садиҡовтарҙың ғаиләһендә беренсе бала булып тыуа. Йомағужа ауылында үҫә, ике йәшендә ҡаты сирләп, инвалид коляскаһына ултыра. Йөрөүе сикләнгән ҡыҙыҡай Өфө ҡалаһының 13-сө махсус мәктәбен тамамлағас, ВЭГУ академияһына уҡырға инә. “Спортҡа мин 2006 йылда Әнисә Сөләймән ҡыҙы ярҙамында килдем. Әле Салауат ҡалаһында йәшәйем, көн дә күнекмәгә йөрөйөм. Көнөнә ике-өс сәғәт шөғөлләнәм”, –− ти Зинира. Йыйылма команда менән берлектә ул Чебоксар, Өфө, Салауат ҡалаларындағы ярыштарҙа ҡатнаша. Үҙенең ихтыяр көсө һәм тырышлығы менән саңғы, еңел атлетика ярыштарында, турист күпалышында бер нисә тапҡыр чемпион исемен яулай.