“Өфө” аэропортында Сочиҙағы ХI Ҡышҡы Паралимпия уйындарынан ҡайтҡан еңеүселәр менән осрашыу булды. Чемпиондарҙы һәм призерҙарҙы уларҙың туғандары, дуҫтары һәм көйәрмәндәре менән бергә Башҡортостан Президенты Рөстәм Хәмитов ҡаршыланы.
Республика башлығы әйтеүенсә, Сочиҙағы Олимпиадала һәм Паралимпиадала Башҡортостан спортсыларының еңеүе айҡанлы ҙур байрам буласаҡ. Күҙалланыуынса, сара ошо көндәрҙә Өфөнөң Спорт һарайында ойошторола, унда шорт-трек буйынса Рәсәй йыйылма командаһының килеүе көтөлә.