Надежда Андреева 1978 йылда Тольятти ҡалаһында донъяға килгән. Тыумыштан һыңар аяҡһыҙ. Ҡыҙҙан ата-әсәһе баш тартҡан, һөҙөмтәлә уның балалыҡ йылдары интернатта, балалар йортонда үткән.
Һамар ҡалаһына аяҡ протезы эшләтергә килгәндә, “Десниуа” йәмғиәте белгестәрен осратҡас, ҡыҙҙың тормошо ҡырҡа үҙгәрә. Ошо мәлдән ул спортҡа тартыла башлай. Тәүге бүләген өлкәләүткән паралимпиада спартакиадаларында яулай.
Ә инде Өфөгә килеүе үҫмерҙең яҙмышына ғәйәт ҙур тәьҫир итә. Уның барлыҡ оло еңеүҙәре Башҡортостан менән бәйле. 2011 йылдан Надежда илдең йыйылма командаһында сығыш яһай. 2012 йылда спорт мастеры исеменә лайыҡ булды. Артабан биатлон буйынса Донъя кубогында еңде, призлы урындарға өлгәште. Бөгөн спортсы Башҡортостан физик культура институтының II курсында уҡый.