Ҡасанғы ғына ваҡиға күҙ алдында тора: кәүҙәгә әллә ни ҙур ҙа булмаған Өфө районының Михайловка ауылы егете Максим Чудов 2008 йылғы донъя чемпионатында, шөһрәтле күп спортсыларҙы артта ҡалдырып, беренселекте яуланы. Еңеүселәрҙе тәбрикләгәндә пьедесталда бөйөк норвегтар Уле-Эйнар Бьорндален менән Халвар Ханевольд, тәүге алтын миҙалы менән ҡотлап, яҡташыбыҙҙы мамыҡ кеүек кенә күтәреп алып, яурындарына ултыртҡайны...
Был хәлдән һуң байтаҡ һыу аҡты. Баш әйләнерлек уңыштар ҙа, үкенесле отолоуҙар ҙа булды. Әммә ошо күренеш беҙҙе, биатлон һөйөүселәрҙе, генә түгел, Максимдың үҙен дә ғүмер дауамында тулҡынландырғыс хәтирәләргә сумдырып-сумдырып, иҫкә төшөр ҙә торор һымаҡ.
Биатлон саңғы спортынан башлана. Максим да тәүҙә саңғыла йөрөй. Хәтеремдә, ул да, бөгөн ҡатын-ҡыҙҙар командаһы лидерҙарының береһе Оля Вилухина ла “Йәншишмә” балалар гәзите призына ойошторолған республика ярыштарында еңгәйне.
Биатлонға үҫмер 16 йәшендә килә. Ситтә ятҡан Михайловка ауылынан Өфөнөң “Биатлон” спорт комплексына көн дә оҙон юл үтеп, күнекмәгә йөрөй. Дүрт-биш йылдан үҫмерҙәр араһында алдынғы урындарға сыға, донъя чемпионы исемен яулай.
22 йәшендә иһә Максим илдең төп йыйылма командаһына эләкте. Бер йылдан Донъя кубогы этабында призлы урын яуланы. Ә “йондоҙло сәғәте” 2007–2008 йылдарҙа һуҡты. Бөтә Башҡортостан халҡы биатлон ярышы булған көндәрҙә телевизор янынан китмәне. Чудов фамилияһы телдән төшмәне. Шәп тиҙлеге өсөн хатта үҙенә “Урыҫ ракетаһы” тигән ҡушамат та бирҙеләр. Ошо осорҙа ул өс тапҡыр донъя чемпионы исемен яуланы.
2009 йылғы донъя чемпионаты һынылыш һыҙығы булды, ахыры. Эҙәрлекләү уҙышында Максим көмөш миҙал алды. Фиништан һуң бер нисә спортсының, шул иҫәптән еңеүсе Уле-Эйнар Бьорндалендың да, ярыш ҡағиҙәләрен боҙғаны асыҡланды. Уларға берәр минут штраф ваҡыты сәпәгәс, Чудов беренсе урынға сыҡты. Әммә иртә ҡыуанғанбыҙ: өс сәғәттән Бьорндаленға миҙалын ҡайтарып бирҙеләр. Әллә бөйөклөгө тәьҫир итте, әллә...
Ниңәлер ошонан һуң Максимдың һөҙөмтәләре аҫҡа тәгәрәне. Ә киләһе йылға Ванкуверҙа Ҡышҡы Олимпиада ине бит! Ҡурҡҡаныбыҙ ысынға сыҡты: Чудов унда шәхсән уҙышта насар сығыш яһаны... Ярай әле тренерҙар эстафетала уға ышанды. Һөҙөмтәлә Рәсәй егеттәре менән бергә бронза миҙал яуланы!
Артабанғы биатлон миҙгеле, ҡыҙғанысҡа ҡаршы, бик уңышһыҙ булды. Уның аҙағында яҡташыбыҙ Германияға һаулығын тикшертергә китте. Ә киләһе йылда инде, арҡаһы ауыртыуы сәбәпле, бөтөнләй сығыш яһаманы.
Былтырғы миҙгелдә илдең йыйылма командаһы тулыланды, йәш, өмөтлө, етеҙ спортсылар күбәйҙе. Максим, тырышыуына ҡарамаҫтан, төп составҡа инә алманы. Ә инде Сочиға Олимпиадаға эләкмәүен белгәс, ул спорт менән хушлашырға тигән ҡарарға килде.
Чудовтың һуңғы ярышы былтыр 28 декабрҙә Германияның Гельзенкирхен ҡалаһында уҙған “Раштыуа уҙышы” булды. Ҡыҙғанысҡа ҡаршы, командалаш иптәше Екатерина Юрлова менән парлап һуңғы, унынсы, урынды ғына алды ул.
Шулай ҙа көйәрмәндәргә күп тапҡыр бәхетле минуттар бүләк иткәне өсөн Максим Чудов ысын күңелдән беҙҙең алҡыштарға лайыҡ. Тормошта ла бирешмә, чемпион!