Йыл спортсыһы

Салауат ҡалаһында – Билбаулы көрәш буйынса донъя чемпионаты. Спортсылар келәмгә сығыу менән зал гөжләргә кереште.
Күренеп тора: бында ысын көйәрмәндәр йыйылған! Ә көрәшселәребеҙгә был, гүйә, көс-ҡеүәт бирә – сит ил ҡунаҡтарын әйләндереп һалып ҡына торалар. Ана, бер келәмдә яҡташыбыҙ Альберт Рәхмәтуллин көс һынаша. Һай, ҡайһылай шәп көрәшә батырыбыҙ! Янына барып ҡына ҡара! Үҙе етеҙ, үҙе көслө!
Хәле мөшкөл түгел – ырғыта ла ебәрә. Тәк, бына хәл иткес алыш. Һай, оҙаҡ алышалар, оҙаҡ. Украин батыры Дмитрий Арабаджи бил бирергә теләмәй. Шулай ҙа булмаһын ти, донъя чемпионаты бит! Ҡаты алыш һәм... чемпион Рәхмәтуллин – ниндәй ғорур яңғырай!
Альберт – Мәләүез районы егете. Көрәш секцияһына ул 1995 йылда тренерҙар Фәнүр Ғәйнетдинов менән Дамир Бикбулатовҡа килә. Мәктәп йылдарында уҡ үҫмер самбо, дзюдо һәм милли көрәш буйынса республика, Бөтә Рәсәй ярыштарында ҙур уңыштарға өлгәшә.
Урал физик культура һәм спорт академияһының Стәрлетамаҡ филиалын тамамлағас, ул үҙе тәрбиәләнгән спорт мәктәбенә ҡайтып, йәштәрҙе көрәш оҫталығына өйрәтә, тәжрибәһе менән уртаҡлаша батырыбыҙ. Альберт Рауил улы – йәш быуын өсөн сағыу өлгө.