Республикабыҙҙан 12 спортсы Рәсәйҙең йыйылма командаһы составында 11 – 21 декабрҙә Италияның Трентино ҡалаһында уҙғарылған ХХVI Бөтә донъя ҡышҡы универсиадаһында ҡатнаша, тип хәбәр иттеләр Йәштәр сәйәсәте һәм спорт министрлығынан.

Мәғлүмәттәргә ҡарағанда, уйындарға донъяның барлыҡ илдәренән өс меңдән ашыу спортсы йәлеп ителгән. Улар биатлон, тау саңғыһы спорты, керлинг, конькиҙа йүгереү, трамплиндан саңғы менән һикереү, сноуборд, фигуралы шыуыу, фристайл, шорт-трек, шайбалы хоккей буйынса көс һынаша. Йәмғеһе 70 миҙал комплекты тапшырыласаҡ.
Рәсәйҙең йыйылма командаһына Башҡортостандан Рәмил Зарифуллин, Адель Сәйфуллина, Дмитрий Жарков, Дмитрий Мигунов, Дмитрий Мясников, Михаил Пудовкин, Ольга Репницина, Антон Копривица, Константин Еркаев инде. Улар араһында шулай уҡ Өфө хоккей мәктәбендә тәрбиәләнгән Юлия Садиҡова, быйылғы миҙгелдә “Ағиҙел” ҡатын-ҡыҙҙар командаһында сығыш яһаған Елена Булатова менән Эллина Митрофанова бар.