Ойоштороусылар тамашаны асыу ваҡытын 20:14 тип тиккә билдәләмәгән: был һандар Рәсәй тарихында беренсе тапҡыр Ҡышҡы Олимпия уйындарын уҙғарыуҙы символлаштыра. «Сочи-2014» Ойоштороу комитеты белдереүенсә, тантана өс сәғәткә яҡын дауам итәсәк. Тамаша туғыҙ бүлектән тора, уларҙың һәр ҡайһыһы донъя ҡунаҡтарына юғары сәнғәт телендә бөйөк илебеҙ тарихының иң мөһим дәүерҙәре тураһында бәйән итә. Был байрам тантанаһында өс меңдән ашыу артист ҡатнаша. Тағы сараға бәйле сәхнә артындағы, стадион майҙансыҡтарындағы, Олимпия паркындағы ойоштороу эштәренә ике меңдән ашыу волонтер йәлеп ителгән. Әйткәндәй, әле Сочиҙа эшләгән 25 мең волонтерҙың 1200-ө — АҠШ, Украина, Канада, Бөйөк Британия, Ҡаҙағстан, Германия, Франция, Белоруссия, Япония, Яңы Зеландия, Камерун, Конго, Пакистан вәкилдәре. Улар алдан уҡ килеп, Сочи ҡалаһының тарихын, уның иҫтәлекле урындарын өйрәнде, әле үҙ илдәре делегацияларын Олимпия ҡалаһы менән яҡындан таныштыра.
Бигерәк тә 4 – 7 февралдә Сочи вокзалдары ҡырмыҫҡа иләүен хәтерләтте. Әле “Адлер” халыҡ-ара аэропорты төрлө илдәрҙән һәм Рәсәй ҡалаларынан көнөнә уртаса 60 рейсты ҡабул итә. Мәскәү — Сочи рейсы ғына ла тәүлегенә 15 тапҡыр башҡарыла. Сочи халыҡ-ара аэропортының генераль директоры Леонид Сергеев әйтеүенсә, Олимпиада көндәрендә бында Стокгольм, Париж, Дюссельдорф, Франкфурт, Вашингтон, Мюнхен, Чикаго, Осло, Прага, София, Вена, Цюрих, Загреб, Токио, Киев, Лондон, Пекин, Милан, Нюрнберг, Шанхай ҡалаларынан һәм донъяның башҡа күп илдәренән рейстар ҡабул ителәсәк. Һуңғы аҙнала, йәғни спортсыларҙың һәм ҡунаҡтарҙың күпләп килеү көндәрендә, аэропорт хеҙмәткәрҙәренә сәғәтенә — 2800, ә көнөнә 25 мең пассажирҙы хеҙмәтләндерергә тура килә. Һүҙ ҙә юҡ, бындай ҙур күләмде Сочи аэровокзалы үҙ көсө менән генә атҡарып сыға алмай, шуға ярҙамға илебеҙҙең төрлө аэропорттарынан 900 хеҙмәткәр һәм авиация уҡыу йорттары студенттары йәлеп ителгән.
Аэропорттың Олимпиада маҡсатына төҙөлгән яңы терминалы, нигеҙҙә, халыҡ-ара рейстар пассажирҙарын хеҙмәтләндерә. Ике-өс сәғәт эсендә бында ниндәй генә ил вәкилдәрен күрмәйһең! Самолеттан килеп төшкән делегацияларҙы, асыҡ йылмайып, инглиз, немец, француз телдәрендә иркен һөйләшкән береһенән-береһе сибәр ҡыҙ һәм егеттәр ҡаршы ала. Махсус әҙерлек үткән был волонтерҙар уларҙы аэровокзал алдында көткән махсус автобустарға оҙата. Бынан ҡунаҡтарҙы ҡалалағы, Ҡыҙыл яландағы, Роза Хуторҙағы ҡунаҡханаларға урынлаштырырға алып китәләр. Волонтерҙар әйтеүенсә, аэропортта иң көсөргәнешле көндәр Олимпиада тамамланып, унда ҡатнашыусыларҙың һәм ҡунаҡтарҙың күпләп ҡайта башлау ваҡытына, 22 – 24 февралгә, тура киләсәк.
Әйткәндәй, 31 ғинуарҙа был аэропортта Халыҡ-ара Олимпия комитеты башлығы Томас Бахты ҡаршы алдылар. Ул Рәсәйҙә Ҡышҡы уйындарҙың аҙағына тиклем буласаҡ. Томас Бах менән бергә Олимпия комитетының башҡа ағзалары ла Сочиға йыйылды. 2-3 февралдә улар тәүге ултырыштарын үткәрҙе. Томас Бах сығышында: «Сочи тарихтағы иң шәп Олимпиаданы уҙғарырға әҙер. Беҙ Олимпия ауылдарында булдыҡ, спортсылар менән аралаштыҡ һәм бөтә нәмә иң юғары кимәлдә үтеренә шигебеҙ юҡ. Бар объекттар ҙа заманса һәм сифатлы төҙөлгән, спортсыларға уңайлы шарттар булдырылған. Иң мөһиме — спортсылар объекттарға яҡын ғына йәшәй: уларҙың 80 проценты, карауатынан тороп, ярыштар урынына йәйәү генә бара. Бындай уңайлыҡты бер Олимпиадала ла күргәнем булманы», — тине.
Сочиҙағы Олимпия уйындарының спорт программаһы ярыштар төрөнөң дөйөм һаны буйынса ла, шулай уҡ программаға индерелгән яңы спорт төрҙәре һаны яғынан да рекорд ҡуя. 2010 йылда Ванкуверҙа уҙған Уйындар менән сағыштырғанда, Сочи Олимпиадаһының спорт программаһына тағы 12 төр ярыш өҫтәлгән. Һөҙөмтәлә Ҡышҡы уйындарҙағы ярыш төрҙәренең һәм миҙал комплекттарының дөйөм һаны 98-гә етә. Уларҙың 29-ы – Яр буйы кластерындағы стадиондарҙа, 69-ы Тау кластерында, асыҡ һауала буласаҡ.
Йәшерен-батырын түгел: 375 мең кеше йәшәгән Сочи халҡы Олимпиадаға әҙерлеккә ҡағылышлы уңайһыҙлыҡтарҙан алты йыл эсендә ялҡып та киткәйне. Улар араһында хатта бында Уйындар уҙғарыуға ҡәнәғәтһеҙлек белдергән кешеләр ҙә булды. Ләкин, бөтә ауырлыҡтар артта ҡалып, әле Сочи 7,2 миллиард кеше йәшәгән Ер шарының төп иғтибар үҙәгенә әйләнгәндә, барлыҡ фекерҙәр ҙә ыңғайға үҙгәрҙе. Күп милләтле бөйөк Рәсәй менән бергә бөгөн бөтә Сочи ХХII Ҡышҡы Олимпия уйындары асылыуҙы сикһеҙ ҡыуанып, оло ғорурлыҡ хистәренә бирелеп тантана итә.
Иртәгә, 8 февралдә, Олимпия майҙандарында тәүге спорт ярыштары башлана. Донъяның 80-дән ашыу иленән Сочи Олимпиадаһына килгән 5500-ҙән ашыу спортсыға һәм уларҙың командаларына еңеүҙәр генә яуларға яҙһын!