Йылайырҙың үҙ янғын һүндереү депоһы буласаҡ21.03.2018
Йылайырҙың үҙ янғын һүндереү депоһы буласаҡЙылайыр районы республикала ҙурлығы буйынса икенсе урынды биләй, күпселек өлөшөн урман тәшкил итә. Шунлыҡтан төбәктә янғын сығыу хәүефе көслө.
Райондың иң төпкөл ауылдары Йылайырҙан 100-ҙән ашыу саҡрымда урынлашҡан. Тәүге янғын һүндереү пункты 1927 йылда төҙөлгән һәм ул атлы янғын һүндереү отряды тип аталған. Артабан был бина төҙөкләндерелеп, ошоғаса район халҡына хеҙмәт иткән.
Һуңғы йылдарҙа янғындарҙың йыш күҙәтелеүе, техниканың иҫкереүе, депоның заман талаптарына яуап бирмәүе район етәкселеген дә борсомай ҡалмай. Шуға күрә Башҡортостандың 100 йыллығына Йылайырҙа янғын һүндереү депоһы төҙөлөүе юҡҡа түгел. Район хакимиәте башлығы урынбаҫары Марс Солтанов әйтеүенсә, төҙөлөш эштәре үткән йылдың октябрендә башланған һәм ике этапта эш алып барылған.
Депо өр-яңы урында сафҡа инәсәк. Объект өсөн республика ҡаҙнаһынан 48 миллион һум аҡса бүленгән. Бина заман талаптарына яуап бирерлек һәм хеҙмәткәрҙәр өсөн уңайлы шарттар булырлыҡ итеп төҙөлә. Бында айырым ял һәм душ бүлмәләре ҡаралған, шулай уҡ төрлө йүнәлештә кәңәшмәләр үткәреү өсөн айырым урын да буласаҡ. Беҙ хәҙер район, төбәк, республика буйынса кәңәшмәләр үткәрә аласаҡбыҙ,ти.
Депо янында волейбол, хоккей майҙансыҡтарын төҙөү планлаштырыла. Янғын һүндереүселәргә спорт күнек­мәләре өсөн дә махсус урындар ҡарал­ған. Бинала янғын һүндереүселәрҙән тыш, Берҙәм дежур, Ғәҙәттән тыш хәлдәр хеҙмәттәре урын аласаҡ. Уларҙың бергә булыуы, янғын осрағы теркәлгән хәлдә, билдәләнгән адресҡа тиҙ арала барып етеү мөмкинлеген тыуҙырасаҡ. Әле Йылайыр янғын һүндереү бүлегендә 28 кеше эшләй, өс берәмек техника бар. Тик янғын һүндереү машиналарының ныҡ иҫке булыуы күп осраҡта бәкәлгә һуға. Бөгөн ике кубометр һыу һыйҙырышлы техниканың янғынды ни тиклем тиҙ һүндереүе хаҡында баш ватырға кәрәкмәй ҙә. Шуға күрә йылайырҙар төбәктә заман талаптарына яуап биргән берҙән-бер янғын һүндереү депоһы үҙ ишектәрен асыу менән бер рәттән 8 –10 кубометр һыу һыйҙырышлы яңы техниканың да булыуына өмөт итә. Иҫке янғын һүндереү машиналары яңы бинаға тап килмәҫ, тип шаярта хеҙмәткәрҙәр. Кем белә, бәлки, уларҙың теләктәрен ишетеүселәр ҙә табылыр. Шулай ҙа бындағы хеҙмәткәрҙәрҙе лә, янғын һүндереү машиналарын да халыҡҡа мөмкин тиклем аҙыраҡ саҡырырға тура килһен ине, тип теләге килә. Төҙөлөш эштәре май айында тамамланасаҡ. Уның тирә-яғын йәшелләндереү, төҙөкләндереү эштәре лә ҡаралған.

Йылайыр районы.


Вернуться назад