Башҡортостандан МХО-ла ҡатнашыусы Фәрит Ғәниев Шайморатов миҙалы менән бүләкләнде

«Башҡортостан» полкының өсөнсө мотоуҡсылар батальоны мотоуҡсылар взводы командиры Фәрит Ғәниев генерал Шайморатов миҙалы менән бүләкләнде. Хәрби хеҙмәткәргә уны республика Башлығы Радий Хәбиров  Башҡортостан хөкүмәтенең оператив кәңәшмәһе барышында тапшырҙы.

«Яҙмышы ҡыҙыҡ уның. Хеҙмәт юлының күпселек өлөшөн прокуратурала һәм тәфтиш комитетында эшләгән, резонанслы эштәрҙе тикшергән, шул иҫәптән генпрокуратура төркөмө составында. Һуңынан Дәүләт Думаһы депутаты булған. Бына хәҙер МХО-ла ҡатнаша, был, һис шикһеҙ, оло ихтирам уята», — тине Хәбиров.

Фәрит Ғәниев бөтә яугирҙар исеменән алғы һыҙыҡҡа ярҙам күрһәткән өсөн республикабыҙға рәхмәт әйтте.

«Башҡортостан» полкында хеҙмәт итеүемә шатмын. Республиканан гуманитар ылауҙар килә, яугирҙәр бик ҡыуана. Беҙ төп бурысты үтәйбеҙ. Барығыҙға ла ҙур рәхмәт!», — тине ул.