Өфөлә республика медицина-генетика үҙәге барлыҡҡа киләсәк.

Ғилми учреждениены Баш­ҡорт­остан Башлығы башланғысы менән Башҡорт дәүләт универ­ситетының биология факуль­тетының генетика фундаменталь медицина кафедраһы ҡарама­ғындағы заманса үҙәк нигеҙендә асыу күҙаллана. Рөстәм Хәмитов былтыр уҡ медицина хеҙмәткәр­ҙәренең тупланған тәжрибәһен киң таратыу һәм ошо өлкәләге ғилми тикшеренеүҙәрҙе артабан да дауам итеү кәрәклеге хаҡында белдергәйне.
Биология фәндәре докторы, Рәсәй Фәндәр академияһы Өфө ғилми үҙәгенең Биохимия һәм генетика институты директоры вазифаһын ваҡытлыса башҡа­рыусы, популяция һәм медицина генетикаһы өлкәһендә илебеҙҙең алдынғы белгестәренең береһе Эльза Хөснөтдинованың һүҙҙә­ренсә, яңы үҙәк республика һәм бөтә Волга-Урал төбәге халҡын нәҫел, онкология һәм социаль әһәмиәтле ауырыуҙарҙы заманса юғары технологик молекуляр-генетика алымдары менән иртә диа­гностикалау һәм дауалау спектры менән тәьмин итә аласаҡ.