Был сауҙа нөктәһенә Рәмзиә менән Ҡәнифйән Саппаровтар етәкселек итә. Йомош менән магазинға килгән һәр кешене хужалар яҡты йөҙ, йылы һүҙ менән ҡаршы ала. Бында кәштәләр бай: Өфөнән, Удмурт, Татарстан республикаларынан ҡайтарылған автомобиль өсөн алмаш частарҙы сират тороп һатып алалар. Клиенттар быны тауарҙың сифатлы, сағыштырмаса арзан, хеҙмәтләндереүҙең юғары кимәлдә булыуы менән аңлата.
Саппаровтарҙың уңған, тырыш һәм бөтмөр ғаиләһенә һоҡланмау мөмкин түгел. Рәмзиә Сабир ҡыҙы сығышы менән Балҡайпан ауылынан. Үрге Тәтешлелә Һаҡлыҡ банкында эшләгәндән һуң, үҙ эшен асырға йөрьәт итеп, эшҡыуарлыҡ менән шөғөлләнә башлай. Тәүҙә район үҙәге баҙарында кейем-һалым менән сауҙа итә, тауар алырға Рәсәйҙең төрлө ҡалаларына барырға тура килә. Тирә-яҡта хужабикәне егәрле ҡатын тип белһәләр, ғаилә башлығы Ҡәнифйән Муллағаян улы хәстәрлекле хужа булараҡ таныш. Ҡәнифйән ағай Бәҙрәш ауылында тыуған. Ғүмер буйы водитель булып эшләгән. Ҡатынына ул эшҡыуарлыҡта ла, тормошта ла ярҙамсы, ныҡлы терәк, таяныс, кәңәшсе. Йорт-ҡуралары, баҡсалары һәр саҡ бөхтә, ҡараулы. Бер-береһен ярты һүҙҙән аңлап, бына 37 йыл татыу ғүмер кисерәләр, ике балаға ғүмер бүләк иткәндәр.
Ата-әсәһенең автомобилгә кәрәкле запас частар, двигатель менән булышыуын бала саҡтан күреп үҫкән улдары Илнур ҙа бай тормош тәжрибәһе туплай. Ижевск нефть институтын тамамлап, бөгөн Үрге Тәтешле ауылында автомобиль йыуғыс һәм шиномонтаж үҙәге асҡан.
– Эшем бик оҡшай, сөнки бала саҡтан автомобилдәр менән ҡыҙыҡһынам. Был шөғөл миндә дәрт-дарман уята. Беҙгә күрше ауылдарҙан да ярҙам һорап киләләр, һәр клиент менән килешеп эшләргә тырышабыҙ.
Ҡыҙҙары Рәфиҙә лә эшҡыуарлыҡ менән шөғөлләнә, “Автодеталь” магазины бинаһында урынлашҡан “Позитив” сувенирҙар һәм бүләктәр кибетенә етәкселек итә.
Хәҙерге баҙар шарттарында үҙ эшен асып, заман менән бергә ҡыйыу, ышаныслы атлаған, яҡташтарына әленән-әле матди ярҙам күрһәткән Саппаровтар, киләсәккә оло пландар ҡороп, ҙур өмөттәр бағлап, эшҡыуарлыҡты артабан да киңерәк йәйелдереү уйы менән йәшәй.