Кисә Республика йортонда Башҡортостан Хөкүмәтенең оператив кәңәшмәһе барышында Рөстәм Хәмитов Премьер-министрҙың иҡтисад буйынса урынбаҫары вазифаһын бөтөрөү һәм уның бурыстарын бүтән вице-премьерҙарға бүлеп биреү хаҡында хәбәр итте. 26 июндә республика етәксеһе ошо туралағы бойороҡҡа ҡул ҡуйғайны.
Документҡа ярашлы, иҡтисад өл­кәһендәге дәүләт идараһы мәсьәләләре, иҡтисади үҫеште тәьмин итеү, инвестициялар күләмен арттырыу буйынса саралар, Башҡортостандың социаль-иҡтисади үҫеш программаларын әҙерләү һәм тормошҡа ашырыу, “Бер тәҙрә” алымы менән дәүләт хеҙмәттәрен этаплап күрһәтеүҙе ойоштороу һәм ҡайһы бер башҡа бурыстар республика Хөкүмәте Премьер-министрының беренсе урынбаҫары Рөстәм Мәрҙәновҡа йөкмәтелде. Йәштәр, физик культура һәм спорт, хоҡуҡ боҙоуҙарҙы иҫкәртеү, енәйәт­селеккә ҡаршы көрәш, йәмәғәт тәртибен тәьмин итеү, мобилизация әҙерлеген ойоштороу мәсьәләләрен Марат Мәһәҙиев көйләйәсәк. Бәләкәй һәм урта эшҡы­уарлыҡты, туризмды үҫтереү өлкәһендәге бурыстар Дмитрий Шароновҡа тапшырылды.
Премьер-министрҙың иҡтисад буйынса урынбаҫары вазифаһынан бушатылған Евгений Маврин — республика Башлығы ярҙамсыһы, ә ошоғаса Өфөнөң Калинин районы хакимиәте башлығы булып эшләгән Григорий Букреев төбәк Башлығы хакимиәтенең муниципаль берәмектәр менән үҙ-ара бәйләнеш идаралығы начальнигы итеп тәғәйенләнде.