Башҡортостан Президенты Рөстәм Хәмитов Валерий Беловты республиканың Сауҙа һәм ҡулланыусылар хоҡуғын яҡлау буйынса дәүләт комитеты рәйесе урынбаҫары итеп тәғәйенләү тураһындағы бойороҡҡа ҡул ҡуйҙы, тип хәбәр иттеләр төбәк башлығының матбуғат хеҙмәтенән.

Валерий Белов 1960 йылда Өфөлә тыуған. Өфө авиация институтын, республика Президенты ҡарамағындағы Башҡортостан дәүләт хеҙмәте һәм идара итеү академияһын тамамлаған.
Хеҙмәт эшмәкәрлеген 1977 йылда Куйбышев тимер юлының Дим энергияны һаҡлау участкаһында электр монтеры булып башлай. Төрлө йылдарҙа инженер, завод начальнигы ярҙамсыһы, коммерция директоры, менеджер булып эшләй. 1999 йылдан һуң Башҡортостан Хөкүмәте Аппаратында төп белгес, баш белгес, баш консультант, советник вазифаларын биләй. 2008 йылдан әлегә тиклем — Башҡортостан Ауыл хужалығы министрлығының аҙыҡ-түлек баҙарын үҫтереү бүлеге начальнигы.