Өфөлә “Ҙур химия” халыҡ-ара форумы асылды. Йолаға әүерелгән мәртәбәле йыйында, Рәсәйҙең һәм сит илдәрҙең нефть, газ химияһы буйынса белгестәренән тыш, Рәсәй Президентының Волга буйы федераль округындағы Тулы хоҡуҡлы вәкиле Михаил Бабич, Башҡортостан Президенты Рөстәм Хәмитов, Татарстан Президенты Рөстәм Миңлеханов ҡатнаша.

“Ҙур химия” республикала өсөнсө тапҡыр үткәрелә һәм халыҡ-ара кимәлдә абруйлы сараларҙан һанала. Бынан алдағы форумдар йомғаҡтары буйынса “Газпром нефтехим Салауат” компанияһы нигеҙендә Бөтә Рәсәй газ һәм химия үҙәген булдырыу маҡсатында эш алып барыла, торлаҡ-коммуналь хужалыҡты яңыртыу программаһы тормошҡа ашырыла. Быйыл “Полиэф” заводы нигеҙендә индустрия паркы асыласаҡ. Волга буйын сеймал менән тәьмин итеү йәһәтенән Башҡортостан, Татарстан республикаларының һәм Ямал-Ненец автономиялы округының берләшеүе әһәмиәтле булды.
– Фән, машиналар эшләү һәм башҡа өлкәләрҙә Рәсәй үҙ позицияларын ҡайтарһын өсөн эшкәртеү тармаҡтарын үҫтерергә кәрәк, – тип белдерҙе Рөстәм Зәки улы. – Былтырғы форумда инвестиция һәм инновация сәйәсәте мәсьәләләре ентекле тикшерелде, әммә, килешеүҙәр төҙөлөүгә ҡарамаҫтан, илдең сәнәғәт баҙарында углеводород сеймалын тәрән эшкәртеү күләме әллә ни артманы.
Ике көнлөк форумда ҡатнашыусылар Волга буйы федераль округында нефть химияһы комплексын үҫтереү, төбәктәрҙә нефть һәм газ химияһы тармағын көсәйтеү буйынса оҙайлы срокка стратегия әҙерләү, нефть һәм газ химияһы комплексы предприятиелары өсөн Ямал — Волга буйы маршруты буйынса сеймал оҙатыуҙы тергеҙеү кеүек көнүҙәк мәсьәләләрҙе тикшерәсәк.

* * *
Халыҡ-ара форум программаһына ярашлы, Волга буйы федераль округы төбәктәре министрҙарының, тармаҡ етәкселәре һәм белгестәренең нефть, газ һәм химия комплексын үҫтереү мәсьәләләре буйынса кәңәшмәһе лә үтте.
Быйыл форумда ҡатнашыусылар алдына ҡатмарлы бурыс ҡуйылған: Рәсәйҙең, шул иҫәптән Волга буйы федераль округының, нефть һәм газ өлкәһендәге стратегияһы тикшерелә. Килеп тыуған мәсьәләләрҙе тикшереү һәм пландар ҡороу менән генә сикләнмәй, ҡарарҙарҙы тормошҡа ашырыу өсөн профессиональ майҙансыҡ кәрәк. Бар эштәрҙе ойоштороуҙы Рәсәй Федерацияһының Энергетика министрлығы алыуы мөһим. Яңы майҙан — координация советы, йәмәғәт советы, бер һүҙ менән әйткәндә, химия сәнәғәтен округта ғына түгел, тотош илдә үҫтереү юлын хәл иткән структура кәрәк.
Халыҡ-ара форумда Башҡортостандағы нефть химияһы тармағының етештереү предприятиелары араһында берлектә эш итеү буйынса килешеүгә һәм протоколға ла ҡул ҡуйылды. Уның маҡсаты — тармаҡ етештергән тауарҙың баҙар шарттарында дәғүәләшеү мөмкинлеген арттырыу, сифатын яҡшыртыу һәм алыш-биреш, әйләнеш даирәһен киңәйтеү өсөн аҙ тонналы нефть химияһы кластерын төҙөү. Проекттың мөһимлеген Башҡортостандың Сәнәғәт һәм инновация сәйәсәте министрлығы күтәреп сыҡты.
Ҡыҫҡаһы, тармаҡ сәнәғәтен үҫтереү, киңәйтеү маҡсатында үткән йыйын үҙ һөҙөмтәләрен бирәсәк, яңынан-яңы мөмкинлектәр асасаҡ.