Башҡортостанда “Берҙәм Рәсәй” Дәүләт Йыйылышы — Ҡоролтай депутатлығына кандидаттар күрһәтеү өсөн дәғүәселәрҙе билдәләү йәһәтенән партия эсендә алдан тауыш биреү эшен башланы.

Сарала партия ағзалары, йәмәғәт ойошмалары, йәштәр берекмәләре тарафынан күрһәтелгән 290 кеше ҡатнаша. Улар араһында шулай уҡ үҙ-үҙен күрһәтеүселәр ҙә бар. Республиканың закондар сығарыу органына һайлау быйыл 8 сентябрҙә үтә.
19 апрелдә ете кандидат Өфөнөң Дим районында һайлаусылар менән осрашты. Республикала йәмғеһе 25 осрашыу үткәреү күҙаллана. Партия эсендә алдан тауыш биреүҙә еңгән кешеләрҙе 2 750 һайлаусы билдәләйәсәк. Шуларҙың яртыһы — йәмәғәт ойошмалары вәкилдәре, ҡалғаны — “Берҙәм Рәсәй” партияһы ағзалары.
Осрашыуҙар Өфө, Стәрлетамаҡ, Нефтекама, Салауат, Бөрө, Мәләүез, Октябрьский, Сибай, Бәләбәй, Белорет, Дүртөйлө, Туймазы, Күмертау, Учалы ҡалаларында, Талбазы, Балтас, Ҡырғыҙ-Миәкә, Мәсәғүт, Иҫәнғол, Шишмә ауылдарында ойошторола. Партия эсендә алдан тауыш биреү 14 майҙа Иглин ҡасабаһында тамамлана.