Аҙналыҡтың тәүге көнөндә АИК швед хоккей клубы рәйесе Петер Мэлквист “Салауат Юлаев” хоккей командаһы менән бәйләнеш булдырыу маҡсатында “Өфө-Арена” боҙ һарайына барҙы. “Киләсәктә ике команданың осрашып тороуын теләйем. Беҙгә еңеү түгел, ә үҙ-ара тәжрибә уртаҡлашыу мөһимерәк”, — тине ул.
Кисә шулай уҡ “Родина” кинотеатрында швед киноһы аҙналығы асылды. Шәмбе Өфө йәштәре Швецияның бар донъяға танылған ди-джейҙарының көйҙәрен тыңлаясаҡ.
Халыҡ швед мәҙәниәте менән танышҡан арала делегаттар республикабыҙ баҙарында үҙ урынын яуларға ниәтләй. Шул маҡсаттан сығып, Швецияның ҙур компаниялары Башҡортостан сауҙа-сәнәғәт палатаһында “SymbioCity” (“СимбиоСити”) семинарын уҙғара. Унда ҡалаларҙа энергияны һаҡсыл тотоноу, биоэнергетика, хужалыҡ һәм сәнәғәт ҡалдыҡтары менән дөрөҫ эш итеү мәсьәләләре хаҡында һөйләшеү була, ҡунаҡтар ошо өлкәләге ҡаҙаныштары менән таныштыра.