Башҡортостанда Һанлы үҫеш һәм яһалма интеллект технологияларын индереү буйынса совет булдырылды

19 майҙа Башҡортостан Башлығы Радий Хәбиров Евразия ғилми-белем биреү үҙәге Өфө вуз-ара кампусының Геном үҙәге майҙансығында республикала яһалма интеллект индереү буйынса стратегик сессияла ҡатнашты. 

Сессия ваҡытында Радий Хәбиров Башҡортостанда Һанлы үҫеш һәм яһалма интеллект технологияларын индереү мәсьәләләре буйынса совет булдырыу тураһында указға ҡул ҡуйҙы. Совет дәүләт органдары, муниципалитеттар һәм ойошмаларҙың ошо өлкәлә үҙ-ара эш итеүен тәьмин итеү өсөн даими эшләүсе орган булырға тейеш. Уға хөкүмәт, эксперт һәм бизнес-берләшмә вәкилдәре инә.