Башҡортостанда опекундарға һәм попечителдәргә «балалар» түләүҙәре арттырылды
Башҡортостан Башлығы Радий Хәбиров республика Дәүләт Йыйылышының июндәге пленар ултырышында ҡабул ителгән етем балаларға түләүҙәрҙе арттырыу тураһында законға ҡул ҡуйҙы.
Түләүҙәр күләме 16,6% арта, тип иҫкә төшөрҙөләр Ҡоролтайҙың матбуғат хеҙмәтендә. Шулай итеп, 3 йәшкә тиклемге баланы ҡарауға опекундарға йәки попечителдәргә түләү айына – 10 855 һум, 3 йәштән өлкәндәргә — 10 439 һум була.
Инвалид баланы йәки һаулыҡ мөмкинлектәре сикләнгән өс йәшкә тиклемге баланы аҫрауға бүленгән аҡсаның күләме айына – 13 027 һум, өс йәштән өлкәндәргә иһә 12 526 һум.
Бюджетта быйылға 87 миллион һум күләмендә аҡса ҡаралған. Арттырылған пособие 1 июндән иҫәпләнә башлай.
Ғаилә, хеҙмәт һәм халыҡты социаль яҡлау министрлығы мәғлүмәттәре буйынса, Башҡортостанда етем балалар һәм ата-әсә ҡарауынан мәхрүм ҡалған балалар категорияһынан 9 681 бала иҫәпләнә. Уларҙың 94% тиерлек ғаиләләргә тәрбиәгә тапшырылған.