– Башланғыстарығыҙҙы тормошҡа ашырыу йәһәтенән ярҙам күрһәтергә әҙербеҙ. Иң мөһиме – улар ныҡлы уйланылған булһын һәм халыҡтың мәнфәғәтенә тап килһен, – тине Радий Хәбиров.
Әбйәлил районы башлығы Илдар Нафиҡов үҙәк район дауаханаһы эшен ойоштороуға һуңғы ваҡытта айырыуса ҙур иғтибар йүнәлтелеүе, бынан тыш, киләһе йыл бер нисә күләмле инвестиция проектын башларға ниәтләүҙәре хаҡында һөйләне. Йәрмәкәй районы башлығы Илшат Райманов иһә муниципалитетта демография мәсьәләләренең даими тикшерелеүе, күрелгән сараларҙың ыңғай һөҙөмтә биреүе тураһында белдерҙе.