Их, беҙҙең Өфө матур һәм төҙөк тә һуң! Айырыуса “ҡыҙыл һыҙат”та урынлашҡан урамдар менән ихаталар күркәм. Әммә саҡ ҡына төпкәрәк инә башлаһаң, ватыҡ асфальт, күп йылдар ремонт күрмәгән ихаталар, хөрт кенә балалар майҙансығы һәм былай ҙа ҡыҫынҡы урамда тығылып ултырған шәхси гараждар...
Өфөлә һәм республиканың башҡа ҡалаларында йәшәүселәр өсөн был таныш хәл. Кисә Башҡортостан Президенты Рөстәм Хәмитов та Өфө ҡалаһы хакимиәте башлығы Ирек Ялалов менән бергә ошоноң кеүек бер нисә ихатала булды. Беҙ төбәк башлығын СССР-ҙың 50 йыллығы урамы, 45/1 адресы буйынса ҡаршы алдыҡ. Ихатала асфальт бөтөнләй юҡ ине. Бәлки, ул ҡасандыр булғандыр... Юлдағы тишек-тошоҡто күп мәртәбә ямағандар, тик бынан ни фәтүә! Кешеләр абына, машиналарҙың аҫты бәрелә. Ә йорт алдына ҡуйылған автомобилдәр араһынан йөрөүе лә ҡыйын. Йорт комитеты рәйесе Лидия Меньшова әйтеүенсә, уларға ихатаны киңәйтергә шәхси гараждар ҡамасаулай. Өфөнөң Октябрь районы буйынса идарасы компанияһы директоры Илдар Ғөбәйҙуллин белдереүенсә, районға ихаталарҙы ремонтлау өсөн республика бюджетынан йыл һайын аҡса бүленә. Эштәр “500 ихата” республика программаһы буйынса башҡарыла. Идарасы компания иҫәбендә 486 йорт бар, ләкин былтыр 10 процентына ғына ремонт яһалған, шуға күрә улар тиҙлекте бер аҙ арттырмаҡсы.
Рөстәм Хәмитов йорт комитеты рәйесе Лидия Меньшова менән аралашты, ихатаның хәл ителәһе урындарын бергәләп ҡарап сыҡтылар. Президент яҡын арала ҡороған ағастарҙы ҡырҡырға ҡушты, сөнки яңыраҡ ҡына шундай ағас йығылыуы сәбәпле йәш егет һәләк булған, бындай хәл ҡабатланырға тейеш түгел.
— Былтыр 500 ихата ремонтланды, быйыл тағы шунсаға өмөт итәбеҙ. Әммә был аҙ, күләмде йылына кәм тигәндә бер меңгә еткереү кәрәк, — тине Рөстәм Хәмитов. — Өфөлә әле 5 мең самаһы ихата бар, эш күләме бик ҙур. Бер юлы гараждарҙы алып ташларға, юлды ремонтларға, ғөмүмән, төҙөкләндереүҙе тиҙләтергә кәрәк.
Ирек Ялалов әйтеүенсә, быйылдан ихата ерҙәрен йорт комитетына тапшыра башлаясаҡтар. Гараж хужалары менән эште хәл иткәс, улар һүтеләсәк һәм бушаған урында автомобиль ҡуйыу өсөн махсус урын эшләнәсәк.
Рөстәм Хәмитов ихатаны төҙөкләндереүҙе иртәгәнән үк башларға һәм 1 июлгә эште тамамларға ҡушты. Шул көндө үҙе килеп тикшерәсәген дә әйткәс, йыйылышҡан халыҡ шатлығын йәшермәне.
— Яҡын арала беҙҙең ихата иң матуры булыр, — тиеште улар.