Берҙәм һайлау кѳнѳндә Рәсәйҙә тѳрлѳ кимәлдәге 4,5 меңдән ашыу һайлау һәм референдум үтте, шул иҫәптән 26 тѳбәктә - башлыҡ, 16-һында - урындағы парламент, бер мандатлы ете округта Дәүләт Думаһы депутаттарын һайланылар.

Тѳбәктәр араһында сәйәси сарала ҡатнашҡандар иҫәбе буйынса әлегә Кемерово ѳлкәһе беренсе урында килә, йәғни 70,1 процент тәшкил итә, ә Новосибирск ѳлкәһе иң артта – 29,4 процент.

Ҡайһы бер тѳбәктәрҙә һайлауҙың икенсе тапҡыр үтеүе лә ихтимал. Мәҫәлән, Хабаровск крайында губернаторлыҡҡа кандидатураһын ҡуйғандарҙың береһе лә 50 процент тауыш йыя алмаған.