“Берҙәм Рәсәй” партияһының “Уңайлы мөхит”, “Урындағы башланғыстарҙы хуплау”, “Аныҡ эштәр”, “Хәүефһеҙ юлдар”, “Рәсәй ауылы” һәм башҡа күп проекттары, тормошобоҙға яңы һулыш өҫтәп, быға тиклем тормошҡа ашмаҫтай тойолған ғәмәлдәрҙе ысынбарлыҡ итте.

Яҡшы башланғыстар туҡталып ҡалмаясаҡ. “Берҙәм Рәсәй” партияһының төбәк бүлексәһенең яңы башланғыстарға арналған форумында һүҙ ошо хаҡта барҙы.

Республика Йәмәғәт пала­таһының Хо­лоҡ төҙәтеү урындарында кеше хоҡуҡ­тарын тәьмин итеү буйынса йәмәғәт кү­ҙә­теүе комиссияһы рәйесе Олег Ғәлин тәҡ­дим иткән проект иреккә сыҡҡан граж­дандарға ярҙам итеүҙе күҙ уңында тота.

Статистика һандары күрһә­теүенсә, бөгөн ҡабатлап енә­йәт ҡылғандар һаны арта, сөнки иректә улар юғалып ҡа­ла. “Беҙҙең бурыс – был граж­дан­дарҙың, башҡаса насар эштәр ҡылмаһын өсөн, үҙен йәмәғәткә кәрәкле итеп тойоуын тәьмин итеү”, – ти Олег Сергеевич.

Әле партия тарафынан өс хәйриә программаһы уңышлы бойомға ашырыла. “Хоҡуҡ десанты” проекты сиктәрендә хо­лоҡ төҙәтеү учреждениеларына төрлө йүнәлештә эш­ләгән белгестәр килеп, хөкөм ителгәндәрҙең һорауҙарына яуап бирә. Ошо ярҙамдан файҙаланып, улар инвалид­лыҡ юллай, документтарын тергеҙә ала. “Һин оно­тол­мағанһың” программаһы ве­те­ран­дарға йүнәлтелеп, оло быуын йәштәр­ҙең уларҙы онотмауын, йәмғиәттең хәс­тәрен тойһон өсөн әҙер­лән­гән. “Һин яңғыҙ түгел” про­грам­маһы сиктәрендә йыл әйләнәһенә Стәрлетамаҡ үҫ­мер­ҙәр өсөн холоҡ төҙәтеү колонияһында психолог, социаль хеҙмәткәрҙәр менән осрашыуҙар үткәрелә, спорт ярыштары ойошторола.

Олег Ғәлин Башҡортос­танда холоҡ төҙәтеү урындарынан иреккә сыҡҡан граждандар өсөн реабилитация үҙәген булдырыу мөһимлеген билдәләне.
Форумда “Халыҡ хәтере” акцияһы ла хуплау тапты. Ул республикала йә­шәгән һәр кемгә атай-олатайҙарының Бөйөк Ватан һуғышындағы хәрби юлы һәм батырлығы хаҡында мәғлүмәт алырға ярҙам итәсәк. Был проектты Рәсәй эҙәрмәндәр хә­рәкәте­нең республикалағы бүлексә­һе рәйесе Владимир Волков яҡлап сығыш яһаны.

Мәғлүмәттәрҙе интернет селтәре аша алыу мөмкин булһа ла, күптәр уны таба алмай йә эҙләй белмәй. Шуға күрә, “Бер­ҙәм Рәсәй” партия­һының урын­дарҙағы бүлексә­ләрендә ошо мәсьәләне хәл итеү буйынса ҡабул итеү ойоштороп, һәр ҡыҙыҡһынған кешегә мәғлүмәт табыуҙа ярҙам ҡулы һуҙыу тәҡдиме индерелде.

Акция 2 сентябрҙә – Икенсе донъя һу­ғышы тамам­ланған көндә старт аласаҡ.

Йыйында файҙалы тәҡ­дим­дәр күп булды. Улар араһында тағы бер көнүҙәк проблеманы хәл итеүгә йүнәлтелгәне бар.

Башҡортостан Йөҙөү фе­дерация­һының яуаплы секретары Рәфис Ғаб­драхманов, быйыл төбәктә балалар­ҙың һыуҙа батып үлеү осрағының йышайыуын билдәләп, физкультура дәрестә­рендә йөҙөр­гә өйрәтеү буйынса сәғәттәр индерергә тәҡдим итте.

Был программа ла хуплау тапты. Уны тәүҙә бер районда һынап ҡарарға, әгәр ҙә тәжри­бә уңышлы килеп сыҡһа, республиканың бөтә ҡала-райондарында ла индерергә тигән фекергә килделәр. Физкультура уҡытыусылары ҡотҡарыу­сылар курсы үтәсәк.