Башҡортостан Үҙәк һайлау комиссияһы рәйесе Хәйҙәр Вәлиев һәм Рәсәй Үҙәк һайлау комиссияһы ағзаһы Евгений Шевченко эш сәфәре менән Яңауыл районында булды. Ҡунаҡтар территориаль һәм участка һайлау комиссияларының эше менән танышты, күп функциялы үҙәктә булды. Унда Хәйҙәр Вәлиев менән Евгений Шевченко һайлау көнөндә граждандарҙың барған ерендә тауыш биреүе тураһындағы ғаризалар ҡабул итеү эшенең нисек ойошторолоуын тикшерҙе, күп функциялы үҙәккә килеүселәр өсөн мәғлүмәт плакаттарына ыңғай баһа бирҙе.

Артабан улар Яңауыл ҡалаһындағы 1-се урта дөйөм белем биреү мәктәбе бинаһында урынлашҡан 3409-сы участка комиссияһына юлланды. Бында комиссия рәйесе Гөлнар Ҡаһирова менән һайлауҙы ойоштороу мәсьәләләре буйынса фекер алышты, практик эш менән танышты.

Ҡунаҡтар урындағы киң мәғлүмәт саралары журналистарына интервью бирҙе, федераль һайлау кампанияһындағы яңылыҡтар, һайлауҙы техник йәһәттән тәьмин итеү, күҙәтеүселәрҙең эше тураһында һөйләне.

Евгений Шевченко Яңауыл районы хакимиәте башлығы Илшат Вәзиғәтов менән осрашты. Ул хакимиәттең һайлау комиссияһы менән аныҡ һәм һөҙөмтәле бәйләнешен булдырған өсөн район етәксеһенә рәхмәт әйтте. Һайлауҙы ойоштороусылар – территориаль комиссия ағзалары, участка комиссиялары рәйестәре, уларҙың урынбаҫарҙары, секретарҙар, киң мәғлүмәт саралары вәкилдәре менән осрашыуҙы Евгений Шевченко Рәсәй Президентын һайлауҙы уңышлы үткәргән өсөн рәхмәт һүҙҙәре менән башланы. Хәйҙәр Вәлиев иһә осрашыуҙа ҡатнашыусыларҙы Башҡортостан Республикаһы Дәүләт Йыйылышы – Ҡоролтай депутаттарын һайлауға әҙерлек барышы менән таныштырҙы, һайлау кампанияһының һуңғы этабындағы төп бурыстарҙы билдәләне.

Һайлауҙы ойоштороусылар менән әңгәмәлә Евгений Шевченко “мобиль һайлаусы” технологияһын ҡулланыуҙың әһәмиәтен, бөгөн республикала 2 меңдән ашыу кешенең яңы тауыш биреү тәртибенән файҙаланыуын, Дәүләт Йыйылышы – Ҡоролтай депутаттарын һайлау көнөндә үҙҙәре барған ерҙә һайлаусылар исемлегенә индереү хаҡында ғариза биреүен билдәләне. Ул шулай уҡ барлыҡ һайлау участкаларында протоколдарға QR-кодын ҡуйыуҙың әһәмиәте тураһында әйтте.

– Тауыш биреү йомғаҡтары протоколына машина ғына уҡый алған код ҡуйыу технологияһы бик үҙенсәлекле, ул башҡа бер ерҙә лә юҡ, – тине Евгений Шевченко. – Код ике бурысты үтәй: тауыш биреүгә аныҡ йомғаҡ яһауҙы һәм “Һайлау” автоматлаштырылған дәүләт системаһына протокол мәғлүмәттәрен йылдам индереүҙе тәьмин итә. Ахыр сиктә – технология һайлауға ышанысты арттыра.

Һайлау комиссиялары эшмәкәрлегенә ул ыңғай баһа бирҙе. Рәсәй Үҙәк һайлау комиссияһы ағзаһы әйтеүенсә, ойоштороусыларға яуаплылыҡты арттырырға, асыҡтан-асыҡ эш итергә кәрәк.

– Һайлауҙың ғәҙеллегендә шик тыумаһын өсөн күҙәтеүселәргә, киң мәғлүмәт саралары вәкилдәренә законда билдәләнгән барлыҡ һайлау ғәмәлдәренең үтәлешенә аңлатма биреү фарыз, – тине ул.

Кәңәшмә аҙағында Хәйҙәр Вәлиев менән Евгений Шевченко территориаль һәм участка һайлау комиссиялары ағзаларына быйыл 18 мартта Рәсәй Президентын һайлауға әҙерләнеүҙә һәм уны үткәреүҙә һөҙөмтәле эшләгән өсөн Рәсәй һәм Башҡортостан Үҙәк һайлау комиссиялары наградаларын тапшырҙы.

Яңауыл районының территориаль һайлау комиссияһы мәғлүмәттәренән.