Октябрьский ҡалаһындағы “НефтеМодульКомплект” фәнни-етештереү предприятиеһы был төбәктә уңышлы эшләгән йәмғиәттәрҙән иҫәпләнә. Етәксеһе Рәмис Мамаев башҡаларға үрнәк булырлыҡ, сөнки ул компанияның иҡтисади хәлен яҡшыртыу менән генә сикләнмәй, социаль мәсьәләләрҙе лә даими хәл итә.

Рәмис Радик улына алты йәш булғанда, уның ғаиләһе күрше Татарстандан Октябрьский ҡалаһына күсеп килә.
– Ошо ҡалала уҡырға барҙым, ошонда үҫтем һәм йәшәйем. Өс балабыҙ менән уның урамдарынан йөрөйбөҙ. Был – беҙҙең ҡала, шуға ла бындағы мәсьәләләр беҙгә яҡшы таныш. Әлеге мәлдә ҡаланың яңы барлыҡҡа килгән 32-се биҫтәһендә балалар өсөн уйын майҙансығы, спорт тренажерҙары, ял урыны юҡ. Шуға ла беҙ уны төҙөкләндереү тәҡдиме менән ҡала хакимиәтенә мөрәжәғәт иттек, – ти эшҡыуар.
Асыҡлап әйткәндә, “НефтеМодульКомп­лект” предприятиеһы үҙ иҫәбенә был биҫтәлә футбол яланы, балалар майҙансығы, урам тренажерҙары һәм ял урыны булған заманса ихата төҙөргә тәҡдим иткән. Ҡала хакимиәте башлығы Алексей Шмелев, эшҡыуарҙың был проектын хуплап, һәр яҡлап ярҙам күрһәтәсәген белдергән.
Рәмис Мамаев – халыҡ араһынан сыҡҡан етәксе. Хеҙмәт юлын “Техснаб” предприятие­һында ябай слесарҙан башлап блоклы ҡорамалдар етештереү буйынса цех начальнигы вазифаһына тиклем үрләй. Шул ваҡытта кешеләр, етәкселәр, документтар менән эшләү тәжрибәһен туплай. Һуңынан, ҡатыны Лариса Нәзиф ҡыҙының кәңәше буйынса, үҙ эшен асырға ҡарар итә. Шулай итеп, 2010 йылда “Смак Ойл” компанияһына нигеҙ һалалар. Һуңынан уны “НефтеМодульКомп­лект” итеп үҙгәртәләр.
2011 йылда “Башнефть” компанияһынан ҡорамалдар етештереүгә ҙур заказ алалар, был иһә предприятиеға ныҡлап аяҡҡа баҫыуға тәүге ҙур этәргес көс була.
Йәмғиәт һәр заказды ваҡытында һәм сифатлы үтәп килә. Шуға ла уны Рәсәйҙә һәм сит илдәрҙә юғары технологиялы ҡорамалдар менән тәьмин иткән һәм хеҙмәт күрһәткән ышаныслы уҙаҡташ тип беләләр.
100-гә яҡын кешегә хеҙмәт урыны булдырған предприятие әле лә үҫеш юлында. Һуңғы ике йылда бында тулыһынса яңы ҡорамалдар ҡуйғандар, заманса етештереү линиялары сафҡа ингән. Былтыр Рәмис Радик улы, “Йыл эшҡыуары” республика конкурсында ҡатнашып, етештереү өлкәһендә лауреат була.
Тормош иптәше Лариса Нәзиф ҡыҙы – компанияның коммерция директоры. Шуға ла социаль проекттар әҙерләү, эшселәрҙең ялын ойоштороу буйынса саралар үткәреү уның иңендә.
– Хеҙмәткәрҙәргә һәм уларҙың балаларына шифаханаларға юлламаларҙы бушлай бирәбеҙ. Яңы йыл, Халыҡ-ара балаларҙы яҡлау көнө кеүек байрамдарҙа балаларға бүләктәр тапшырабыҙ, ҡыҙыҡлы саралар ойошторабыҙ. Һаулыҡ, Нефтселәр, Ватанды һаҡлаусылар көнө кеүек иҫтәлекле көндәрҙе лә, байрамдарҙы ла коллектив менән билдәләйбеҙ, спорт уйындары үткәрәбеҙ, – ти Лариса Нәзиф ҡыҙы.
Предприятиеның изге ғәмәлдәре бының менән генә сикләнмәй. Компания Яңы йыл байрамы алдынан ҡалала йәшәгән аҙ тәьмин ителгән күп балалы ғаиләләргә, Ҡыш бабай менән өйҙәренә барып ҡотлап, бүләктәр тапшыра. “Ломая барьеры” конкурсы финалына сыҡҡан Максим Сорокинға ла улар ярҙам иткән. Шулай уҡ ҡалала бокс, футбол кеүек спорт төрҙәрен үҫтереүгә булышлыҡ күрһәтәләр. “Нефтсе” паркында барлыҡҡа килгән “Нефтселәрҙең хеҙмәт батырлығына” һәйкәле лә – Мамаевтарҙың изге эштәренең һөҙөмтәһе. Былтыр “Урындағы башланғыс­тарға булышлыҡ итеү” программаһында ҡатнашып, 22-се мәктәптең тәҙрәһен алмаштырыу өсөн – 65 мең һум, 27-се балалар баҡсаһын ремонтлауға 25 мең һум аҡса биргәндәр.
Ысынлап та, Рәмис Мамаевтың изге эштәре күп һәм уларҙың һәр береһе һоҡланғыс. Ошондай социаль сәйәсәт алып барған, изге юлдан йөрөгән эшҡыуарҙарыбыҙ күберәк булһын, тип теләргә ҡала.