Башҡортостан етәкселеге, халыҡтың мәнфәғәтен күҙ уңында тотоп, төрлө проекттар буйынса эшмәкәрлекте киң йәйелдерә. Мәҫәлән, Көньяҡ Уралды иҡтисади йәһәттән үҫтереүҙең урта сроклы комплекслы программаһына ярашлы, бихисап маҡсат-пландар уңышлы тормошҡа ашырыла. Ошо көндәрҙә сираттағы ҡыуаныслы яңылыҡтың шаһиты булдыҡ – Өфөләге Инвестор йортонда Lasselsberger GmbH инвестицион өҫтөнлөклө проектын ғәмәлгә ашырыу тураһында килешеүгә (Әбйәлил районында ҡоро төҙөлөш ҡатнашмаһы етештереү буйынса завод төҙөлөшөнөң I этабы) ҡул ҡуйылды. Рәсми документҡа республикабыҙ Хөкүмәтенең Премьер-министры урынбаҫары Илшат Тажетдинов, Lasselsberger GmbH компанияһынан вәкил Йозеф Ласселсбергер, “Цемикс” яуаплылығы сикләнгән йәмғиәтенең генераль директоры Го Жан һәм Әбйәлил районы хакимиәте башлығы Рим Сыңғыҙов ҡул ҡуйҙы.


Австрия компанияһының иғтибарын ҡаҙылма байлыҡтарға бай Әбйәлил тарафтары, асылда ундағы мәрмәр, эзбизташ ятҡылығы тиккә генә йәлеп итмәй. Бында ең һыҙғанып эшләү өсөн һәр яҡлап та уңайлы шарттар бар: сеймал аяҡ аҫтында ята тигәндәй, эшсе ҡулдар етерлек, эргәлә генә тимер юлы. Ысынлап та, Первомайский ауылы янында аҡ цемент, микрокальцит һәм ҡоро төҙөлөш ҡатнашмаһы етештерә башлау (ҡеүәте – йылына 424 мең тонна продукция) төбәк үҫешенә һәр йәһәттән дә ыңғай йоғонто яһаясаҡ. Беренсенән, халыҡҡа күпләп эш урыны булдырыла. Проектты бойомға ашырыуҙың тәүге баҫҡысында уҡ 220 кеше эш менән тәьмин ителәсәк, һуңғараҡ инде был һанды 500-гә хәтлем еткереү күҙ уңында тотола. Юғиһә ҡайһы берәүҙәр “оҙон аҡса” артынан ҡайҙа ғына сапмай?! Мәскәү, Санкт-Петербург ҡалаларына, вахта ысулы менән Себергә лә сығып китәләр, күрше ятҡан Магнитогорскиҙы телгә алырға ла түгел. Икенсенән, инфраструктура һиҙелерлек ыңғай яҡҡа үҙгәрәсәк. Кем төҙөк һәм заман менән бергә атлаған ауылда йәшәүҙән баш тартһын, ти! Һүҙ ҙә юҡ, Первомайский киләсәктә үҫәсәк. Өсөнсөнән, логистика тураһында ла оноторға ярамай. Ғөмүмән, өҫтөнлөклө инвестицион проекттың район ғына түгел, ә республика үҫешенә тос өлөш индерәсәгенә шик юҡ. Әлбиттә, был проект Көньяҡ Уралдың иҡтисади ҡеүәтен арттырасаҡ. Рәсәйҙә әле аҡ цемент тик бер урында – Мәскәү янындағы предприятиела ғына етештерелә.
Керамика плитәһе һәм төҙөлөш ҡатнашмалары етештергән “Ласселсбергер” – ҡеүәте буйынса Европала дүртенсе урынды биләгән компания. Уның Өфөлә төҙөлгән заводы – Рәсәйҙә берҙән-бер.
Әйткәндәй, Сочиҙа уҙған Рәсәй инвестиция форумы сиктәрендә “Төбәктәргә инвестиция – киләсәккә инвестиция” тигән пленар ултырышта Рәсәй Хөкүмәте Рәйесе Дмитрий Медведев сығыш яһаны, унда Башҡортостан Башлығы Рөстәм Хәмитов ҡатнашты.




Илшат ТАЖЕТДИНОВ, Башҡортостан Хөкүмәтенең Премьер-министры урынбаҫары:
– Башҡортостан Башлығы Рөстәм Хәмитовтың ҡушыуы буйынса былтыр Әбйәлил районында ҡоро төҙөлөш ҡатнашмаһын етештереү тураһында инвестицион проектты тормошҡа ашырыу тураһында уй-ниәттәр протоколына ҡул ҡуйғайныҡ. Ойоштороусыһы – Lasselsberger GmbH компанияһы һәм уның етәксеһе Йозеф Ласселсбергер. Шулай уҡ төбәктә эш урындарын тағы ла арттырыу мәсьәләһе хаҡында ла фекер алыштыҡ. Хөкүмәт аппаратында проектҡа яуаплы махсус эшсе төркөм төҙөлдө. Ошондай башланғыстар Көньяҡ Уралды иҡтисади йәһәттән үҫтереүҙең урта сроклы комплекслы программаһына көслө этәргес бирәсәк.

Рим СЫҢҒЫҘОВ, Әбйәлил районы
хакимиәте башлығы:
– Ауылдың йөҙө кешеләрҙең кәйефенә туранан-тура бәйле, ә инде уларҙың һәр береһенең шөғөлө булһа, был икеләтә ҡыуаныс. Первомайский ауылы эргәһендәге төҙөлөшкә ер участкаһы бүленде, сеймал етерлек. Завод эшләй башлау менән, ауыл икенсе һулышын кисерәсәк. Артабан да ошо йүнәлештә эште да-уам итәсәкбеҙ.