Башҡортостандың Үҙәк һайлау комиссияһында Рәсәй Үҙәк һайлау комиссияһы ағзалары Сергей Сироткин һәм Евгений Шевченко төбәк сәйәси партия етәкселәре менән осрашты.

– Беҙҙең төп бурыс – һайлау процесында ҡатнашыусылар менән күҙмә-күҙ осрашып, улар­ҙың ҡайһы берҙәре еткергән етешһеҙлектәрҙе, башҡа мәғлүмәттәрҙе ентекләп тикшереү, – тине Сергей Сироткин. – Беҙҙең бында килеүебеҙ Башҡортостанда һайлау мәлендә ҙур закон боҙоуға юл ҡуйылған икән тигәнде аңлатмай. Киреһенсә, Рәсәйҙең башҡа төбәктәре менән сағыштырғанда, Башҡортостандан мөрәжәғәттәр күпкә аҙыраҡ, йәмғеһе – 70.
Осрашыу барышында республикала теркәлгән һәр партия вәкиленә һүҙ бирелде. Улар үҙҙәренең фекерҙәре менән уртаҡлашты, һайлау мәлендә килеп тыуған етешһеҙлектәрҙе барланы. “Иң мөһиме – аңлашылмаусанлыҡ закондарҙы белеп бөтмәүҙән килә” тигән фекер менән бөтәһе лә килеште. Был йәһәттән Башҡортостандың Үҙәк һайлау комиссияһында эшләгән “тура бәйләнеш”, комиссия ағзаларына туранан-тура мөрәжәғәт итеү мөмкинлеге күпселек ваҡытта ярҙамға килә, тип белдерҙе йыйылыусылар.
Сергей Сироткин менән Евгений Шевченко партия етәкселәренең бихисап һорауҙарына яуап бирҙе, етешһеҙлектәр теркәлгән райондарға шәхсән барып, хәлде урындарҙа тикшерҙе.