Күптән түгел Дәүләт Думаһы Хөкүмәт тарафынан әҙерләнгән “Рәсәй Федерацияһында сәнәғәт сәйәсәте тураһында” закон проектын беренсе уҡыуҙа ҡараны. Доклад менән сығыш яһаған Рәсәй сәнәғәт һәм сауҙа министрының беренсе урынбаҫары Глеб Никитин фекеренсә, ул киң йәмәғәтселек тикшереүен үтте, Федерация субъекттары һәм эшҡыуарҙарҙың яҡлауына лайыҡ булды. Документ яңы индустриаллашыу өсөн норматив нигеҙ булып, структур реформаларҙы аҙағына еткереү һәм эшкәртеү сәнәғәтен тиҙләтеп үҫтереүгә хеҙмәт итер тип күҙаллана.
Докладсының баҫым яһап әйтеүенсә, закон проекты өс проблеманы хәл итә: дәүләттең сәнәғәт сәйәсәтендәге ролен билдәләй, тармаҡ ҡанундарында осраған етешһеҙлектәрҙе бөтөрә һәм сәнәғәт эшмәкәрлегенә ярҙамдың яңы ысулдарын индереүгә булышлыҡ итә. Министр урынбаҫары шулай уҡ Рәсәй Президенты Владимир Путиндың идеяһы буйынса булдырыласаҡ ватан сәнәғәтен үҫтереү фонды хаҡында ла телгә алып үтте һәм проект буйынса фекер алышыуҙа асыҡланасаҡ кәмселектәрҙе икенсе уҡыуға бөтөрөү буйынса барлыҡ сараларҙың күрелә- сәгенә ышандырҙы.
Думаның матбуғат хеҙмәте хәбәр итеүенсә, пленар ултырышта “Рәсәй Федерацияһында милли сәнәғәт сәйәсәте тураһында” закон проекты менән билдәле депутат Елена Панина ла сығыш яһаған. Аталған документ 2008 йылда уҡ тәҡдим ителеүгә ҡарамаҫтан, Рәсәй Хөкүмәтенең ҡаршылыҡ күрһәтеүе арҡаһында, тикшереүгә сығарылмаған. Ә бөгөнгө ҡатмарлы шарттарҙа закондың граждандар, ил яҙмышы өсөн мөһимлеген танырға мәжбүрҙәр. Панина фекеренсә, Хөкүмәт индергән закон проектының 70- 80 проценты әле һүҙ барған документты ҡабатлай һәм альтернатива һанала алмай.
Ниһайәт, “һул көстәр” күптән һөйләй килгән документ ҡабул ителһен өсөн, ниндәйҙер дәрәжәлә нигеҙ барлыҡҡа килде кеүек. Ләкин Рәсәйҙә сәнәғәт сәйәсәте ғәмәлдә эш итһен өсөн, уны парламенттың ике палатаһы ла ҡабул итеүе һәм Рәсәй Президенты тарафынан ҡул ҡуйылыу ғына етмәй.
Глеб Никитин билдәләп үтеүенсә, Бөтә донъя сауҙа ойошмаһында ағза булыу дәүләттең предприятиелар эшмәкәрлеген дәртләндереүҙә ҡатнашыуын сикләй. Был да ғәжәп түгел, сөнки Көнбайыш илдәрендә капиталдың тәбиғәте хосуси булып, уға ҡаҙна аҡсаһы бүлеү һалым түләүселәр хоҡуғын боҙоу иҫәпләнә. Ҡалыпҡа Рәсәй иҡтисады һыймай, әммә Бөтә донъя сауҙа ойошмаһында ағза булғас, талап менән иҫәпләшмәй ярамай. Был – бер.
Икенсенән, 2015 йылға дәүләт ҡаҙнаһы ла сәнәғәтте үҫтереүҙән бигерәк оборона һәм именлек өлкәһенә сығымдарҙың ҡырҡа артыуы, йәғни һәр егерменсе һумдың ошо маҡсатта тото- ноласағы менән әһәмиәтле. Был Кремлдән сыҡҡан инициативаға депутаттарҙың төҙәтмә индерергә ынтыласағы ышандырмай, ә бына Резерв фондындағы триллион һумдарҙы сәнәғәт сәйәсәтен ғәмәлләштереүгә йүнәлтеү ихтималлығы бар.
Сәйәсәт сәнәғәткә лә бик мәслихәт. Ҡайһы бер компетентлы белгестәр раҫлауынса, ватан иҡтисадын үҫтереүҙең финанс сығымдары етерлек. Рәсәй Фәндәр академияһы академигы Абел Аганбегяндың күптән түгел Думала уҙған парламент уҡыуҙарында белдереүенсә, Рәсәй банктарының активы 55 триллион һумға етһә лә, ике проценты ғына сәнәғәтте үҫтереүгә булышлыҡ итә. Рәсәй Президентының төбәктәр иҡтисады буйынса кәңәшсеһе Сергей Глазьев та академикты йөпләп, ватан етештереүсеһенә оҙайлы һәм арзан кредит биреүҙе яйға һалырға кәрәклегенә баҫым яһаны. Рәсәй Банктары ассоциацияһы рәйесе Гарегин Тосунян кредит биреүҙә билдәлелек етешмәүгә ризаһыҙлыҡ белдерҙе.
Владимир Лениндың образлы сағыштырыуынса, сәйәсәт – ул иҡтисад-тың үҙенсәлекле сағылышы. Ҡыҙға- нысҡа ҡаршы, Көнбайыш даирәләре йоғонтоһо менән үҙ граждандары мәнфәғәттәрен яраҡлаштыра алмаған, сирек быуат буйына күсеү осоро ҡыйынлыҡтары артына ышыҡланырға яратҡан федераль власть ил граждандары өсөн лайыҡлы курсты таба алмай яфалана.