“Беҙ Ҡырымды ҡайтарыу тураһында күптән һөйләй инек, Путинды уны алырға мәжбүр иттек. Ләкин был тәүге аҙым ғына. Артабан ул (Путин. – М.Ф.) ни эшләр, ҡарарбыҙ. Советтар Союзын бөйөк дәүләт тип танырға, иҡтисадты националләштерергә халыҡҡа социаль гарантиялар тәьмин итергә кәрәк. Әгәр ҙә беҙҙең программа Президент тарафынан үтәлә, кешеләр яҡшыраҡ йәшәй башлай икән, беҙгә власта булыу-булмауҙың әһәмиәте юҡ...”
Был юлдар – КПРФ рәйесе Геннадий Зюгановтың урынбаҫары Валерий Рашкиндың “Газета.РУ” интернет-гәзитенә биргән интервьюһынан. Имеш, “Путин, олигархтар даирәһенән булыуына ҡарамаҫтан, Рәсәйҙең коммунистик патриотик дәүләт булараҡ ҡына йәшәргә һәләтлелеген аңлай башланы”. Әҙәм ышанмаҫтай хәбәрҙе ысын булһа ла һөйләмә тигәндәй, коммунист Кремль башлығының уларға эйәреүе хаҡында, әлбиттә, шыттыра. Бында һүҙҙең мәнфәғәттәр тап килеүе тураһында ғына барыуы ихтимал.
Артабан В. Рашкин коммунистарҙың Мәскәү ҡала думаһына һайлауҙарға бәйле ВДНХ бинаһында уҙасаҡ съезында Яңы Рәсәйгә (Донбасс. – М.Ф.) гуманитар ярҙам йөҙөнән “Ҡыҙыл Мәскәү“ исемле берҙәм патриотик фронт ойоштороуы тураһындағы фекере менән уртаҡлаша. Бәлки, ирекмәндәр ҙә ебәрелер тип, урынбаҫар ҡораллы бәрелештәрҙә ҡатнашасаҡ Рәсәй кешеләре хаҡында әйтеүҙән дә тартынмаған. Уйнап һөйләһәң дә, уйлап һөйлә, тиҙәр. Шовинизм һәм империализм идеялары аңҡып торған был фекерҙәрҙең коммунист ауыҙынан сығыуы, ысынлап та, таң ҡалдыра. Урынбаҫар үҙе лә һиҙмәҫтән Украина һәм Ҡырым ваҡиғалары өсөн өлөшләтә яуаплылыҡты үҙҙәре өҫтөнә ала. Донбасста – йәйҙән бирле дауам иткән ҡан ҡойош, миллион ҡасаҡ, емерек ауылдар һәм ҡалалар, ваҡытынан алда өҙөлгән тиҫтәләрсә мең ғүмер, етем балалар...
Коммунистар был мәхшәрҙе туҡтатырға түгел, ә дауам итергә йыйына. Геннадий Зюганов үҙе лә телевидение экрандары аша Донбасс кешеләрен “фашистлашыусы Киев хунтаһы”на ҡаршы торорға, тимәк, ҡан ҡойошто дауам итергә саҡыра. Нимә хаҡына? Был һорауға баш коммунист туранан-тура яуап ҡайтармай, ләкин һүҙ юҫығының Донбассты Украинанан айырыуға барыуы аңлашыла. Бындай саҡырыу — Икенсе донъя һуғышынан һуңғы сиктәрҙең тейелгеһеҙлеге тураһында 1948 йылда Женевала ҡабул ителгән декларацияны тупаҫ боҙоу.
Дөрөҫ, коммунистарҙың был ҡаһарманлығын “Газета.РУ“ Мәскәү ҡала думаһына һайлауҙарға бәйле пиар-аҙым тип баһалай. Йәнәһе, шул рәүешле һул көстәр һайлаусыларҙың тауышын күберәк йыйырға ынтыла. Ләкин баш ҡала граждандарының асыҡтан-асыҡ ялған патриотизм, бөйөк державасылыҡ шовинизмы, хәрби ҡорал менән ҡаршы тороу юлына баҫҡан коммунистар өсөн тауыш бирәсәгенә өмөт үҙе үк оятһыҙлыҡ һәм һөмһөҙлөк сағылышы түгелме ни? Һәр хәлдә, гражданлыҡ позицияһынан сығып ҡарағанда, ул шулай баһалана ла.
Нисек кенә булмаһын, күрше дәүләттә ил башлығын һайлап ҡуйҙылар, бер айҙан парламентлы булырға торалар. Бойондороҡһоҙ Украина дәүләтенең эске эштәрендә Рәсәй коммунистарының бер ҡыҫылышы ла юҡ. Улар бынан бер быуат самаһы элек “бөтә донъяла буржуйҙарға ҡаршы ут асырға” хыялланған ата-бабаларының ҡылығын ҡабатларға йыйына икән, уның ни менән тамамланыры билдәле. Эйе, күршеләр Европа союзына ынтыла һәм уның өсөн рөхсәтте Рәсәй коммунистарынан һорарға йыйынмай. Был — уларҙың халыҡ-ара хоҡуҡ нормаларына һыйған изге ихтыяры.