Симферополдә республика етәксеһе Ҡырым башлығы вазифаһын башҡарыусы, министрҙар Советы рәйесе Сергей Аксенов, Совет ағзалары менән осрашты, Белогорск районына барып, биләмәнең социаль-иҡтисади хәле менән танышты.
Әйткәндәй, Рәсәй Федерацияһы Хөкүмәте ҡарарына ярашлы, Ҡырымдағы 14 районды һәм ике ҡаланы Рәсәйҙең иҡтисади йәһәттән алға киткән 16 төбәгенә беркетеү схемаһы раҫланғайны. Башҡортостан Белогорск районын шефлыҡҡа алды. Хәҙер ул республикабыҙҙың 55-се муниципаль районына әүерелгәндәй.
Белогорск ҡалаһында саҡта төбәк башлығы үҙәк район дауаханаһына юлланды, унда операция блогын, бала табыу һәм педиатрия бүлеген ҡарап сыҡты. Дауалау учреждениеһы биналарына капиталь ремонт, һыу үткәргес, канализация һәм йылылыҡ селтәрҙәрен алмаштырыу талап ителә. Медицина ҡорамалдарының 90 проценттан ашыуы иҫке. Тейешле аппаратура булмау сәбәпле хирургтар ябай операциялар ғына яһау мөмкинлегенә эйә. Юғары технологиялы медицина ярҙамы күрһәтеү өсөн пациенттар Симферополгә ебәрелә.
Табиптарҙың уртаса эш хаҡы — 6000, кесе медицина персоналыныҡы 4 200 һум тәшкил итә. Баш табип Любовь Рудых әйтеүенсә, 2003 йылдан алып дауахана ихтыяждарының 30 проценты ғына финанслана. Аҡса эш хаҡына һәм коммуналь хеҙмәттәр өсөн түләүгә генә етә.
Рөстәм Хәмитов шулай уҡ Кирилл Щелкин исемендәге мәктәп-гимназияла булды, ундағы уҡыу кластарын, спорт залын һәм ашхананы ҡарап сыҡты. Бинала ремонт бер тапҡыр ҙа үткәрелмәгән, шуға күрә ул капиталь төҙөкләндереүгә мохтаж.
Белогорск тарих-тыуған яҡты өйрәнеү музейын ҡарағандан һуң, республика башлығы район мәҙәниәт йортона юлланды. 1960 йылда һалынған бинаға капиталь ремонт кәрәк. Төбәк етәксеһе шулай уҡ музыка мәктәбендә, яңы мәсет төҙөлгән майҙансыҡта булды.
Сәфәр барышында Рөстәм Хәмитов Белогорск халҡы менән осрашты, һорауҙарға яуап бирҙе. Осрашыу барышында Башҡортостан Хөкүмәте менән Белогорск район дәүләт хакимиәте араһында хеҙмәттәшлек тураһындағы протоколға ҡул ҡуйылды. Документҡа Хөкүмәт Премьер-министрының беренсе урынбаҫары Рәүеф Ноғоманов һәм район хакимиәте башлығы Константин Луговик имза һалды. Протоколда Белогорск районының социаль инфраструктураһын нығытыу бурыстары билдәләнгән. Мәҫәлән, Башҡортостан яңы уҡыу йылына мәғариф учреждениеһын тәртипкә килтерәсәк, уҡыуҙы Рәсәй стандарттарына күсереү буйынса эш башҡарасаҡ. Шулай уҡ Белогорск районы абитуриенттары өсөн Башҡортостандағы юғары һәм урта махсус уҡыу йорттарында ауыл, урман хужалығы, төҙөлөш йүнәлештәре буйынса квоталар индереләсәк.
Шефлыҡ ярҙамы күрһәтеү буйынса эште көйләү өсөн республикабыҙ Хөкүмәтендә оператив штаб ойошторолдо. Уға республиканың Дәүләт заказдарын урынлаштырыу буйынса дәүләт комитеты рәйесе Сергей Новиков етәкселек итә.