Депутатты хәйбуллалар аныҡ эштәр башҡарған, вәғәҙәләрен үтәгән, халыҡты борсоған мәсьәләләрҙе хәл итеүҙә ҡатнашҡан кеше булараҡ яҡшы белә. Шуға күрә күптәр Рөстәм Борғанетдин улы ҡабул иткән көнгә яҙылырға тырыша. Был юлы уға ете кеше килде. Һорау-үтенестәрҙең төрлөһө булды.
Маҡан ауылында йәшәгән хеҙмәт ветераны Шафиҡ Ҡарабаев һайлау алдынан бирелгән наказдың нисек үтәлеүен белергә теләһә, мәктәп директоры Әлфирә Юнысова “Йыл уҡытыусыһы” конкурсында ҡатнашҡан осорҙа баш ҡалала ваҡытлыса йәшәү өсөн торлаҡ табыу мәсьәләһе борсоуын әйтте, шулай уҡ депутаттың белем усағындағы бәҙрәфте файҙаланыуға тапшырыу йәһәтенән ярҙам күрһәтеүен һораны. Ауыл осонда, Сиҙәм урамында йәшәгән Мәмдүҙә Ғарипова иһә, ҡоҙоҡҡа ремонт яһаған саҡта уның йортона һуҙылған торбаларҙы өҙөүҙәре сәбәпле, инде ике йыл һыуҙы ситтән ташыуы хаҡында бәйән итте. Яңғыҙ донъя көткән ҡатынға был, әлбиттә, еңел түгел. Мәмдүҙә инәй үҙе йәшәгән урамдың ҡышын ҡарҙан таҙартылмауы хаҡында ла белдерҙе, Интернеттың юҡлығына ла зарланды.
Депутат һайлаусыларының һәр һорауын ентекле тыңлап, ҡулынан килгәнсә ярҙам итергә һүҙ бирҙе. Тейешле урындарға шылтыратып, ҡайһы берҙәрен шунда уҡ яйға һалып та ҡуйҙы. Мәҫәлән, педагогтар конкурсында ҡатнашҡан уҡытыусыға һәм теләктәшлек төркөмөнә Өфөнән ваҡытлыса бүлмә биреү мәсьәләһен. Депутат шулай уҡ Аҡъяр элемтә бүлеге начальнигы Марат Кәримовҡа шылтыратып, Маҡандағы йорттарға Интернет селтәренең тоташтырылмауы хаҡында белдерҙе һәм ғариза яҙған кешеләрҙең үтенестәрен тиҙ арала хәл итеүҙе һораны.
Ә бына шәхси эшҡыуар Данил Дәминевтең проблемаһын хәл итеүҙә байтаҡ ҡыйынлыҡ буласағы көн кеүек асыҡ. Районда тәүгеләрҙән булып “Ғаилә һөтсөлөк фермаһы” программаһында ҡатнашҡан эшҡыуар үҙенең үтенесе менән байтаҡ етәксене урап сыҡҡан. Хәл былайыраҡ була: Данил Дамир улы яңы техника һатып алыу өсөн (атап әйткәндә, «МТС-80») бер фирмаға 670 мең һум аҡса түләй, йәғни уның хаҡын тулыһынса ҡаплай. Әммә һөйләшелгән ваҡытҡа трактор хаҡында килешеү төҙөгән фирма юҡҡа сыға. Т. фамилиялы кеше аша башҡарылған ғәмәл булғас, эшҡыуар тәүҙә уға мөрәжәғәт итә, әммә һөҙөмтә булмай. Артабан судҡа ялыу бирәсәге хаҡында белдергәс, тегеһе: “Ҡылан һуң”, – тип кенә яуап ҡайтара. Эшҡыуарҙы үҙҙәренсә ҡурҡытырға ла тартынмайҙар, күпме яҙһаң да, беҙгә бер ни булмаясаҡ, тип кенә ебәрәләр. Хәләл тирен түгеп, ғаиләһенең ауыҙынан өҙөп тигәндәй йыйған аҡсаһының елгә осоуын, кемдеңдер кеҫәһен ҡалынайтыуға өлөш индереүен аңлағас, Данил Дәминев дөрөҫлөк юлларға тотона. Әммә уның һүҙен ишетергә теләүселәр табылмай, ахыр сиктә, эшҡыуар, ярҙам һорап, депутатҡа мөрәжәғәт итә.
Рөстәм Аблаев эшҡыуарҙы ентекле тыңлағандан һуң законға ярашлы эш итергә кәңәш бирҙе. Тәүҙә Хәйбулла район судына ғариза яҙырға кәрәклеген аңлатты, артабан эште контролдә тотасағын белдерҙе.
Башҡа мәсьәләләр менән мөрәжәғәт итеүселәрҙең дә һорауҙарын депутат иғтибар менән тыңланы һәм, һәр береһенең дәғүәләрен өйрәнеп, ярҙамлашырға вәғәҙә бирҙе.
Артабан Башҡортостан Республикаһы Дәүләт Йыйылышы – Ҡоролтай депутаты Рөстәм Аблаевтың үҙ һайлаусыларын ҡабул итеү көнө билдәләнгән график буйынса алып барыласаҡ. Ҡабул итеүҙә күтәрелгән барлыҡ һорау-үтенестәр ҙә яуапһыҙ ҡалмаясаҡ, тип ышандырҙы депутат үҙе лә.