Өфө ҡала Советы ултырышында депутаттар яңы ете урамға һәм ике тыҡрыҡҡа атама биреү тураһында ҡарар ҡабул итте. Уларҙың барыһы ла Ленин районындағы Кооператив биҫтәһендә урынлашҡан.

Тиҙҙән Өфөнөң картаһында РСФСР-ҙың атҡаҙанған һәм Башҡорт АССР-ының халыҡ артисы Баныу Вәлиева, Башҡорт АССР-ының атҡаҙанған сәнғәт эшмәкәре, Башҡорт дәүләт филармонияһының ҡуйыусы-режиссеры Фәтих Иҡсанов, халыҡ мәғрифәтсеһе һәм уҡытыусыһы, 136-сы башҡорт лицейына нигеҙ һалыусы Мөхәммәт Исҡужин, Бөйөк Ватан һуғышы һәм хеҙмәт ветераны Муса Вәлитов исемендәге, шулай уҡ Ирәмәл, Тағанай һәм Артезиан урамдары, Нөгөш һәм Сармат тыҡрыҡтары барлыҡҡа киләсәк.