Әбйәлил халҡы ташҡын ҡуйынында ҡалды

Быйылғы йәйҙең тәүге яртыһы ҡоролоҡ менән йонсотһа, халыҡ бесәнгә төшөргә йыйына башлау менән ҡайһы бер райондарҙа ҡойма ямғырҙар китте. Айға яҡын дауам иткән яуым-төшөм Белорет, Бөрйән һәм бигерәк тә Әбйәлил районы халҡына ҙур зыян килтерҙе. Быны һуңғы көндәрҙә асыҡ күрҙек.

Бер туҡтамай яуған ямғырҙар үтә лә күңелһеҙ эҙемтәләргә килтергән: ярҙан сыҡҡан йылғалар юлдарҙы һәм күперҙәрҙе йыуған, кешеләрҙең йорт-ҡураларына үтеп ингән, хатта бесәнлектәрҙә күбәләрҙе ағыҙып алып киткән осраҡтар ҙа теркәлгән. Мәҫәлән, Әбйәлилдә 200-ҙән ашыу йорт ташҡын ҡуйынында ҡалған, Ҡыҙыл йылғаһы ярҙан сығып ете күперҙе емергән, тигән хәбәр ишетелде. 773 кеше (264 бала) ваҡытлыса тороу пункттарына урынлаштырылған. Магнитогорскиға илткән трассаның бер нисә өлөшөн һыу йыуған, шуға ла Асҡарҙан был ҡалаға юл ябылған. Тиҫтәләгән еңел машина юлдың тирә-яҡтан һыу менән уратылған өлөшөндә тороп ҡалған, был урындарҙан тик ҙур йөк машиналары ғына үтә ала икән. Һигеҙ ауылда (Таштимер, Үтәгән, Ишкилде, Сәйетҡол, Буранғол, Исхаҡ, Йәлембәт, Селивановка) электр уты юҡ.
Халыҡ ташҡынға нисек тә булһа ла ҡаршылыҡ күрһәтергә тырыша: бер нисә "КамАЗ", карьер таштарын ташып, һыу юлын ҡаплаған булған. Әммә һыуҙың көслө баҫымы уларҙы ситкә алып ташлаған. Ташҡын трассаның бер өлөшөнә бигерәк ҙур зыян килтергән, унан бер ниндәй техника үтерлек түгел.
Эйе, зыян ҡот осҡос: бындай бәлә Әбйәлилдә һуңғы йылдарҙа беренсе тапҡыр теркәлгән. Мәҫәлән, Буранғолда Ҡутырҙы йылғаһы, үҙенең йүнәлешен үҙгәртеп, ауылға килеп инә һәм аҫҡы урамдың Тәләкә йылғаһы буйындағы бик күп йортто баҫҡан. Әле районда һыу аҫтында ҡалғандарҙы ҡотҡарыу эше бара, ауыр техника ташҡын менән көрәшә.
Йылға-күлдәрҙәге дүрт гидротехник ҡоролмалағы һыуҙы ваҡыты-ваҡыты менән шлюздар аша сығарып тора, әммә ямғыр туҡтамаһа, уның дамбаны йырыуы бик ихтимал. Был осраҡта дүрт меңдән ашыу кешенең ташҡын аҫтында ҡалыуы бар.
Ямғыр бер аҙға ғына булһа ла туҡтамай, икенсе көн яуыуын дауам итә. Яуым-төшөм күләме тәүлек норманан өс тапҡырға күберәк тәшкил иткән. Шулай уҡ Абҙаҡтағы ял йорто ла ташҡын ҡуйынында ҡалған, һыу шәхси ихаталарҙы ла баҫҡан. Бөрйән районының Ҡолғана ауылында ла ҡойма ямғырҙар эҙемтәһеҙ үтмәгән: бында ла халыҡтың йорт-ҡураһы, бесәнлектәре ҙур зыян күргән, хатта мал-тыуары ағып киткән осраҡтар ҙа теркәлгән.
Әйткәндәй...
Башҡортостандың гидрометеорология үҙәгендә хәбәр итеүҙәренсә, республиканың көньяҡ-көнсығышында яуым-төшөм бер-ике көн дауам итәсәк әле. Шулай ҙа ямғырҙар көсәймәйәсәк, киреһенсә, яйлап кәмейәсәк, тип ышандырҙылар метеорологтар.
Рәсәйҙә ташҡындар арҡаһында Якутияла, Хабаровск һәм Приморье крайҙарында, Амур өлкәһендә һәм Еврей автономиялы округында ғәҙәттән тыш хәл иғлан ителгән. Шулай уҡ күрше Силәбе өлкәһенең ҡайһы бер ауылдарын да һыу баҫыуы билдәле. Мәҫәлән, Париж ауылында ғәҙәттән тыш хәл иғлан ителгән.

Мария ВОИНОВА, Рәсәйҙең Башҡортостан буйынса Ғәҙәттән тыш хәлдәр министрлығының матбуғат хеҙмәте хеҙмәткәре:
– Әлеге ваҡытта Әбйәлилдең һигеҙ ауылын һыу баҫҡан, ҡотҡарыу эшендә 234 кеше һәм 75 техника мәшғүл. Зыян күреүселәр өсөн алты ваҡытлыса тороу пункты эшләй. Шулай уҡ Белорет районының Яңы Абҙаҡ һәм Мөхәмәт ауылдарын да һыу баҫты. Бында 114 кеше һәм 34 техника ҡотҡарыу эшен башҡара. Әлегә ташҡын буйынса ғәҙәттән тыш хәл Әбйәлил районында ғына иғлан ителгән.