Әле мәғариф өлкәһендә "сәсеүгә әҙерлек мәле" тип әйтергә мөмкин. Ошо уңайҙан педагогтарҙың, ата-әсәнең хәлен белештек. Улар яңы уҡыу йылын ниндәй кәйефтә ҡаршылай икән?

Ғарифулла ҠОТЛОҒӘЛЛӘМОВ, Дәүләкән районы хакимиәтенең мәғариф идаралығы етәксеһе:
— Һәр ваҡыттағыса, райондың барлыҡ мәктәптәре яңы уҡыу йылына тейешенсә әҙерләнде. Ҙур төҙөкләндереү эштәренә килгәндә, Яңы Йәнбәк, Ҡыҙрас, Суйынсы, Рассвет, Вперед мәктәптәренә капиталь ремонт яһалды. Шулай уҡ Иҫке Мерәҫтәге мәғариф учреждениеһының, район үҙәгендәге 4-се, 8-се балалар баҡсаларының ҡыйығы алмаштырылды, 1-се мәктәптең йылытыу системаһы үҙгәртеп ҡоролдо.
Районда I класҡа 424 бала килә — былтырғыға ҡарағанда күберәк.

Инсур ҮТӘБАЕВ, Бөрйән районының Әбделмәмбәт мәктәбе директоры:
— Үткән уҡыу йылында ҙур ғына ҡаҙаныштарға өлгәштек, шуға күрә 1 сентябрҙе яҡшы кәйеф менән ҡаршылайбыҙ. 14 — 16 августа Бөрйән мәктәптәренең яңы уҡыу йылына әҙерлеге тикшереләсәк. Был йәһәттән беҙҙә барыһы ла эшләнде. Әбделмәмбәт урта мәктәбенә, шулай уҡ уның Ҡолғана, Килдеғол ауылдарындағы филиалдарына косметик ремонт яһалды, август аҙағына тиклем һыу үткәреләсәк. Утын етерлек әҙерләнде.
Шөкөр, уҡыусылар күп, тимәк, ҡулайлаштырыу янамай. Филиалдарҙан балалар йөрөтөү өсөн яңы автобус та вәғәҙә иттеләр. Юл һәйбәт.

Роза ҒӘББӘСОВА, уҡытыусы-пенсионер, Архангел районының Тәүәкәс ауылы:
— Белем көнөн һәр саҡ һағынып ҡаршы алам. Уҡытыусыларға рәхмәт: беҙҙе, уҡытыусы-пенсионерҙарҙы, байрамға йыл һайын саҡырып торалар. Хатта әле 92 йәштәге әсәйем Әсмә Баһауетдин ҡыҙы ла Белем көнөн ашҡынып көтөп йөрөй, телмәр тоторға әҙерләнә.
Шулай ҙа элек был байрам шатлыҡлыраҡ, күңеллерәк үтә торғайны. Быйылғыһы нисек булыр инде... Мәктәптә башланғыс һәм V, VI кластар ғына ҡалды, педагогтарҙы ҡыҫҡарттылар. Өлкән кластарҙа дүрт уҡытыусы ҡалды, улар барлыҡ предметты уҡытырға тейештер инде...

Элина БАЛТИНА, Мәсетле районы:
— Улым Арыҫлан быйыл VI класҡа бара. Күп уҡыусылар кеүек үк, әлбиттә, дәрестәрҙән бигерәк класташтарын, дуҫтарын һағынды. Каникул ваҡытында ял итеп кенә ҡалманы, әҙәби әҫәрҙәр уҡыны, Интернеттағы бер алым буйынса почеркын яҡшыртыу өҫтөндә эшләнек.
Әле Арыҫлан үҙебеҙҙең Оло Ыҡтамаҡтағы "Әсә һәм бала" шифаханаһында ял итә һәм һаулығын нығыта. Унда яҡшы итеп ҡарайҙар, көнөнә алты тапҡыр ашаталар, көн дә ҡыҙыҡлы саралар ойошторалар — улым бик ҡәнәғәт.

Азат БӘХТИЕВ, Иглин ҡасабаһы:
— Белеүемсә, республикабыҙ уҡыусыларҙың ялын ойоштороу буйынса илдә алдынғы урынды биләй. Быны мәктәп йәшендәге балаһы булған һәр ғаилә тоялыр. Мәҫәлән, улыбыҙ Илшат яратҡан спорт түңәрәктәренән айырылманы. Мәктәп биләмәһендә көн һайын футбол уйнанылар, ярыштарға йөрөнөләр. Класташтары менән ике тапҡыр Ҡариҙел буйына походҡа барыу ҙа файҙалы булды. Ялы һәйбәт уҙған бала уҡыуҙа ла һынатмаҫ.