Салауат ҡалаһының әүҙем йәштәре ғәҙәти булмаған акция ойошторҙо.

Ҡалала иң насар юл һаналған Өфө урамындағы соҡор-саҡырҙарҙы ер менән күмеп, сәскә ултырттылар. Ошо урамға ингән ерҙә “Иғтибар! Был участкала асфальт әҙ” тигән һүҙҙәр яҙылған плакат ҡуйылды. Юлдарҙың төҙөкләндерелмәүенә ризаһыҙлыҡ белдереү һөҙөмтәһеҙ ҡалманы. Бер нисә көндән был юлда ремонт эштәре башланды.
Акцияны ойоштороусы Айҙар Зәйнетдинов әйтеүенсә, “Юлдарһыҙ Салауат” тип аталған сара күптән түгел Ленин майҙанында ла ойошторолған. Унда йәштәр соҡорҙарҙы буяу менән уратып алған.
Юлдарҙың насар булыуына яуаплы кешеләрҙең иғтибарын ғәҙәти булмаған ысул менән йәлеп итеү ябай мөрәжәғәттәргә ҡарағанда нығыраҡ тәьҫир итеүенә инанды салауаттар.