Башҡортостан Президенты Рөстәм Хәмитов дөйөм белем биреү ойошмаларындағы беренсе класс уҡыусылары өсөн мәктәп кейеменең өҫтәмә комплекты тураһындағы Указға ҡул ҡуйҙы.

Документ ошондай учреждениеларға беренсе класҡа уҡырға барасаҡ балалары булған ғаиләләргә өҫтәмә дәүләт ярҙамы күрһәтеүҙе күҙ уңында тота. Уға ярашлы 2013 — 2014 уҡыу йылында дәүләт һәм муниципаль дөйөм белем биреү ойошмаларындағы беренсе класс уҡыусыларының барыһы ла жилет һәм жакет рәүешендәге өҫтәмә кейем комплекты менән тәьмин ителәсәк. Указ менән Башҡортостандың Мәғариф министрлығына кейем-һалым әҙерләүгә заказ урынлаштырыу, уны балаларға ваҡытында тапшырыуҙы тәьмин итеү бурысы ҡуйылды.