Көндәр йылыныу менән Башҡортостан халҡы үрмәксенән зыян күрә башланы. Уның тешләүе ауырттырып ҡына ҡалмай, шешендерә лә.

БДУ профессоры Владимир Книс белдереүенсә, ул — көньяҡ урыҫ тарантулы. Үрмәксенең был төрө Урта Азияла һәм Рәсәйҙең көньяғында таралған. Сүл, дала, урман-дала буйында дымлы урынды, ер аҫты һыуҙары мул булған ерҙәрҙе үҙ итә. Ул Елец һәм Ҡазан киңлектәренә тиклем таралған, һыу буйындағы ҡом аша төньяҡҡа үтеп инә бара.
Үрмәксенең ҙурлығы 25-35 миллиметр, ҡуйы йөн менән ҡапланған, көрән-ерән һәм ҡайһы берҙәре ҡара төҫтә, ситтәре аҡһыл ҡабарынҡы йөнлө, аҫты ҡуңыр була. Уның һигеҙ күҙе бар. Башындағы ҡара бүрегенә ҡарап, уны башҡа үрмәксе-бүреләрҙән айырырға мөмкин. Ул үҙенең тирәһендә 20-30 сантиметр алыҫлыҡта хәрәкәт иткән бөжәкте тиҙ генә күреп ҡала.
Тарантул ағыулы. Яра тәрән булмаһа ла, ағыуы тирегә һирпелә. Тешләгән урынын мотлаҡ өтөргә кәрәк, был ағыу термик ысул менән тарҡала.