Бер үк онотмағыҙ Ғаилә тарҡалғандан һуң, нисек кенә ауыр булмаһын, икенсе яртығыҙға алмаш эҙләргә ашығырға ярамай. Ҡабаланмағыҙ, ә яңғыҙ ҡалған мәлегеҙҙе үҙ файҙағыҙға файҙаланығыҙ. Яңғыҙлыҡ иреккә әүерелһен, түбәнһенмәү, үҙеңде нығытыу өсөн этәргес булһын. Күңелһеҙ уйҙарығыҙҙан бер ни ҡәҙәр ваҡыт арынып ҡарағыҙ, иғтибарығыҙҙы һөнәрегеҙгә, яратҡан шөғөлөгөҙгә йүнәлтегеҙ. Бер кемгә лә бәйле булмауығыҙҙы һәм буйһонмауығыҙҙы тойоу өсөн барыһын да эшләгеҙ.
Маҡтаһаң да, уйлап әйт
Маҡтауҙың ҡатын-ҡыҙ өсөн дә, ир-атҡа ла берҙәй файҙалы булыуы фәнни яҡтан иҫбатланған. Әммә улар икенсе яртыһынан төрлө баһа һүҙҙәре көтә. Ҡатын-ҡыҙға “Һеҙ нисек барһығыҙ, шулай матурһығыҙ” тип әйтеү оҡшаһа, ир-атҡа ҡатынының балалары, ғаиләһе өсөн оло хәстәрлек күреүе тураһындағы йылы һүҙҙәре йөрәгенә һары май булып ята.
Үҙ-ара итәғәтле булығыҙ Совет осоронда “Үҙ-ара итәғәтле булығыҙ” тигән яҙма һәр магазинда тиерлек була торғайны. Бик уйлап эшләнгән, дөрөҫ кәңәш ул. Ғаиләгеҙҙә бер-берегеҙгә итәғәтле булығыҙ. Яҡын кешегеҙҙең тауышын һәм һүҙен ишетегеҙ. Был һис тә ҡатмарлы түгел, сөнки ысын һөйөү үҙеңде уйлауҙан, хәстәрлек күреүҙән генә тормай, ә икенсе яртың хаҡында ҡайғыртыу ҙа.
Яратылыуыңды тойоу — һәр кемдең иң ҙур теләк-хыялы. Ул кешене ҡанатландыра, күккә күтәрә.
Үпкәләүҙе онотоуҙың биш ысулы
Рәнйеүҙе, үпкәләүҙе онотоу өсөн ябай ғына ысулдар тәҡдим итәбеҙ.
1. Өйөгөҙҙө йыйыштырығыҙ. Хатта быға ҡәҙәр ҡулығыҙ етмәгән шкафтарҙағы әйберҙәрҙе барлағыҙ, балаҫты, мендәрҙәрҙе ҡағығыҙ. Кискә, барлыҡ эшегеҙ тамамланғас, асыуығыҙ хатта иҫегеҙгә лә төшмәҫ.
2. Рәхәтләнеп көлөгөҙ. Бының өсөн яратҡан комедиялы видеокассета ҡарағыҙ. Тик фильм иҫ киткес ҡыҙыҡлы, онотолорлоҡ булһын.
3. Асыулы хис-тойғонан ҡотолоу өсөн, мәҫәлән, мендәрҙе нисек булдыра алаһығыҙ — шулай ҡаҡҡылағыҙ, гәзитте ваҡ-ваҡ киҫәктәргә йыртҡылағыҙ, һис тә булмаһа, кәрәкмәгән берәй әйберҙе ватығыҙ. Ҡайһы саҡ был да ярҙам итә.
4. Бәләкәй балалар йыш ҡына асыуҙарын бер урында тыпырҙап, аунап-тәгәрәп белдерә. Уларҙың өлгөһөнә эйәрергә лә ярай, ҡайһы мәл ошолай эшләү ҙә булышлыҡ итә.
5. Тәрән итеп тын алығыҙ, табан аҫты һәм тубыҡ мускулдарын бер нисә секунд ныҡ ҡына ҡыҫып тороғоҙ. Тынығыҙҙы тышҡа сығарғанда, киреһенсә, мускулдарҙы йомшартығыҙ.
Барыһын да дөрөҫ атҡарғанда, аяҡ буйлап йылы йүгерер. Шундай уҡ күнегеүҙе эс, ҡулдар, ҡулбаш һәм муйын менән дә ҡабатлағыҙ.
Мини-тренинг
Көсөргәнешле аҡыл эше талап ителмәгәндә, мәҫәлән, ҡайҙалыр йөрөгәндә, һауыт-һаба йыуғанда, түбәндәге һүҙҙәрҙе ҡабатлағыҙ.
Шулай уҡ уларҙы магнитофон таҫмаһына яҙҙырып, йоҡлар алдынан йәки иртәнсәк тыңларға ғәҙәтләнегеҙ. Был һүҙҙәр төпкө аңға үтеп ингәс, үҙегеҙгә ҡарата баһағыҙҙың һәм ышаныстың артыуын тойорһоғоҙ.
*Башҡаларҙың иғтибарын йәлеп итерлекмен.
*Һөйөүгә һәм ихтирамға лайыҡмын.
*Башланған һәр эште аҙағынаса еткерәм.
*Мин — үҙенсәлекле шәхес.
*Уңышты тартыусы магнитмын.
*Һәр көн яңы һәм яҡшы мөмкинлек алып килә.