Баҡса еренең әселеген асыҡлау өсөн лакмуслы махсус әйберҙең һәр кемдең ҡул аҫтында булмауы ихтимал. Әселекте ябай ғына ысул ярҙамында белергә мөмкин. Мәҫәлән, ҡара ҡарағаттың йәки муйылдың өс-дүрт япрағын алып, бер стакан ҡайнар һыуҙа бешерәһең. Һыуынғас, уға бер аҙ ғына тупраҡ һалаһың. Һыу ҡыҙғылт төҫкә инһә, тимәк, ер әсе, йәшелерәк икән — әселеге аҙ; сирен төҫөнә инә икән — әсе түгел. Баҡса тупрағы әсе икән, ул күп кенә йәшелсә, емеш-еләк ағастары үҫтереү өсөн яраҡлы түгел.