Белорет районының яҙғы ташҡындан ҙур зыян күргән Ғәбдөк ауылы халҡына гуманитар ярҙам ойошторолоуы, 23 апрелдә ярҙамдың тәүге ылауы тейешле урынға оҙатылыуы хаҡында хәбәр иткәйнек инде. Кисә редакциянан ошо ауылға ҡарай тағы бер ылау ҡуҙғалды.

Тәүге автомашина юлды йылға баҫып китеүе арҡаһында Ғәбдөккә барып етә алманы, редакция хеҙмәткәрҙәре йөктө ауыл биләмәһе үҙәге Йөйәктә бушатырға мәжбүр булғайны. Кисә барған ылау тәғәйенләнгән урынына етә алды, йөктө бушатҡандан һуң ауыл халҡына Башҡортостан Республикаһының халыҡ артисы Әлфиә Юлсурина менән Башҡортостан Республикаһының атҡаҙанған артисы Юнир Салауатов хәйриә концерты күрһәтте.
Һыу баҫыу эҙемтәләре, халыҡтың һәм дәүләттең зыян күреүселәргә ярҙам итеү кимәле, ауылдың бөгөнгө хәле тураһындағы репортажды гәзиттең киләһе һандарының береһендә уҡый алаһығыҙ.