Республикабыҙҙың Мәҙәниәт министрлығының күсмә коллегияһы ултырышы Балтас районында осраҡлы үтмәне. Балтастарҙың коллегалары менән уртаҡлашырлыҡ тәжрибәһе етерлек. Һәр ауылда мәҙәниәт усаҡтары гөрләп тора, матди-техник базалары яҡшы, сығарылыш уҡыусылары, техник вуздарҙан тыш, мәҙәни йүнәлештәгеләренә лә күпләп уҡырға инә.

Әйткәндәй, бәрәкәтле был төбәк илебеҙгә бихисап йырсы, бейеүсе, артист үҫтергән. Быларҙың барыһы ла район хакимиәтенең мәҙәниәткә тейешле иғтибары хаҡында ла һөйләй.
Башҡортостандың мәҙәниәт министры Әминә Шафиҡова Рәсәй Президенты Владимир Путиндың 2014 йылды Рәсәй Федерацияһында Мәҙәниәт йылы тип иғлан итеүе тураһындағы Указын уҡып ишеттергәс, яңылыҡты барыһы ла дәррәү ҡул сабып алҡышланы.
– Республикала ғүмерҙәрендә бер тапҡыр ҙа симфоник оркестрҙың моңо яңғырамаған ауылдарҙың булыуы, улай ғына ла түгел, бала-сағаның театр йә концерттың ни икәнен дә белмәй үҫеүе уйландыра. Ошо хатаны төҙәтеү маҡсатында быйыл профессиональ коллективтарҙың гастролдәре планлаштырыла. Был тәңгәлдә уларға ярҙам итһәгеҙ ине, – тигән үтенесен белдерҙе министр.
Әйткәндәй, ҡайһы бер ауылдарҙа мәҙәниәт йорттары компьютер менән йыһазландырылмаған, интернет юҡ, белгестәр етешмәй.
Әминә Шафиҡова билдәләүенсә, төбәктең социаль иҡтисадын үҫтереүҙә этнотуризм стратегик йүнәлештәрҙең береһе һанала, үҙ сиратында ул мәҙәни мираҫты һаҡлауға ла булышлыҡ итә.
Мәҙәниәт үҫешенә тос өлөш индергән бер төркөм хеҙмәт алдынғыларын бүләкләү тантанаһынан һуң сарала ҡатнашыусылар сәнғәт мәктәбе эше менән танышты, Нөркә һәм Тушҡыр ауылдарының мәҙәниәт йорттарында булды, Батырша музейына сәфәр ҡылды, Аҫау ауылындағы модель китапханаһын асыуҙа ҡатнашты. Шулай уҡ һәр кем Белорет һәм Туймазы райондары алып килгән библиобустағы китаптарҙы ҡараны. "Башҡортостан" киностудияһы иһә киномобиль ярҙамында кино күрһәтте.

Айҙар Мөхәмәтйәнов, Ейәнсура районы хакимиәтенең мәҙәниәт бүлеге начальнигы:
– Күптәр ҡулайлаштырыу хаҡында һүҙ ҡуйыртҡанда, беҙҙә мәҙәниәт усаҡтарының һәммәһе лә эшләй. Быйыл сараларҙы бигерәк тә күп ойошторҙоҡ. Өлкән быуын вәкилдәренә тәғәйенләнгән кисә, шәл байрамы, театр коллективтарының фестивале, "Үҫәргән" театрының сығышы, "Байыҡ" бейеү конкурсы, йәштәрҙең "Ейәнсура йондоҙо" тигән бәйгеһе, май байрамдарына арналған концерт – шуға асыҡ миҫал. Өҫтәүенә, һәр ауыл күрһәтмә сара уҙғара, ул әҙиптәргә йәки арҙаҡлы шәхестәргә арнала.

Фәнил Кинйәғолов, Ғафури районы хакимиәтенең мәҙәниәт бүлеге начальнигы:
– Быйыл ете ауылдың мәҙәниәт йортона газ индерелә. Был инде күптән булмаған хәл, хеҙмәткәрҙәрҙең шатлығы сикһеҙ. Мәҙәниәт министрлығы аҡса бүлде, рәхмәтебеҙ ҙур. Ҡулайлаштырыу бар, әлбиттә, ул мәҙәниәткә генә түгел, һәр өлкәгә лә ҡағыла. Уның ҡарауы, беҙҙә бер клуб та ябылманы, район хакимиәте башлығы был мәсьәләгә бик етди мөнәсәбәттә.