Хеҙмәтсәндәрҙең халыҡ-ара теләктәшлек көнөндә республикала һауа шарттары бигүк шәптән булмаһа ла, ямғыр байрам кәйефен боҙа алманы. Бөтә ҡала һәм райондарҙа 1 Май митингтары, спорт ярыштары һәм концерттар үтте.

Был көндә баш ҡалабыҙҙа ял парктарын асыу күптән матур йолаға әүерелгән. Быйыл да унан тайпылманылар. Барлыҡ фонтандар һәм парктар кисә халыҡты тантана менән һөйөндөрҙө.
Өфөләге Ленин майҙанында Башҡортостан профсоюздары митинг ойошторҙо. Эшһеҙлекте кәметеү, лайыҡлы хеҙмәт хаҡы түләү мәсьәләләрен күтәргән бындай акциялар, ғөмүмән, ил буйынса ла уҙғарылды.