Башҡортостанда республика Хөкүмәте Аппараты кубогына дәүләт һәм муниципаль хеҙмәткәрҙәр араһында спартакиада дауам итә.

Ошо көндәрҙә Өфөләге 44-се мәктәптең спорт залында өҫтәл теннисы буйынса ярыш үтте. Унда республика Хөкүмәте Аппараты командаһы еңеү яуланы. Президент Хакимиәте командаһы — икенсе, Өфө ҡалаһы хакимиәте — өсөнсө, Башҡортостан Республикаһы Дәүләт Йыйылышы — Ҡоролтай Секретариаты командаһы дүртенсе булды.
Бөгөн “Башнефть” йәмғиәтенең һөнәри шашка клубында шахмат һәм шашка буйынса, 20 апрелдә “Динамо” комплексының бильярд клубында бильярд спорты буйынса бәйге уҙғарыла. Спартакиада программаһында 10 спорт төрө буйынса көс һынашыу ҡаралған. Улар араһында мәкенән балыҡ тотоу, саңғы ярышы, пневматик мылтыҡтан атыу, йөҙөү, бәләкәй футбол, шашка, шахмат, өҫтәл теннисы, бильярд спорты һәм волейбол бар. Әле спорттың алты төрө буйынса республика Хөкүмәте Аппараты командаһы алдынғылыҡты бирмәй.