Ошо көндәрҙә республиканың көнсығыш райондарында ҡапыл йылытасаҡ. Был йылғаларҙың кимәле күтәрелеүенә сәбәпсе булыуы ихтимал. Павловка, Йомағужа, Нөгөш һыу һаҡлағыстарында һыу туплау дауам итә.

Стәрле йылғаһының ярҙарына ҡайтыуы күҙәтелә. Уны боҙ тығындарынан таҙартыу ҙа үҙ һөҙөмтәһен биргән. Белорет, Өфө, Стәрлетамаҡ, Ҡырмыҫҡалы райондарында ташҡын кәмеүгә бара. Архангел районының Оло Инйәр йылғаһында ла хәл тотороҡланған. Районда тағы алты ауылды һыу баҫыуы ихтимал. Был хәлде булдырмаҫ өсөн барыһы ла эшләнә.
Бүздәк районының Ҡыҫҡайылға ауылында ҙур фажиғә булған — 10 йәшлек малай һыуға батҡан. Ул, иптәштәре менән йылға буйында уйнап йөрөгәндә, ярҙан ҡолап төшкән. Ҡотҡарыусылар килгәнсе, ауылдаштары баланың кәүҙәһен ауылдан 500 метр алыҫлыҡта тапҡан.
Ташҡын — хәүефле мәл. Шуға ла балаларҙы йылға буйына ебәрмәгеҙ, хәүефһеҙлек сараларын күрегеҙ.